Riba Dia di Labor gobierno di Aruba a anuncia un ahustacion di e salario minimo cu 3%. Tin sector cu a rabia cu e aumento aki, politiconan cu a chercha cu e 3%, pero esunnan cu tabata gana 1711 florin mensual, fin di mei a haya 53 florin extra den nan man.
Pa esunnan cu tin hopi, 53 florin ta nada. Pero esunnan cu no tin, sa ki balor e 53 florin ey tin, asina un comunicado di ministerio di labor. ‘Pa un famia, e ta representa por ehempel 10 kipashi extra, unda cu antes, a lo mejor, no tabatin pan pa mucha hiba scol’, e comunicado ta sigura.
E progreso y desaroyo di un pais ta bay man den man cu progreso y desaroyo di su pueblo. Aruba a pasa den decadanan largo di e fenomeno di ‘cheap labor’. Esaki a crea desaroyo economico pa nos pais, pero e pueblo trahado no a haya bienestar social na mes momento. Tur lo contrario, Aruba; pa negligencia y politica di avestruz, a cay den un abismo social desastroso y tristo pa cualkier nacion. Ki bal tin supuesto desaroyo economico mientras gran parti di bo pueblo ta sufri di hamber? Pa por biba, mama y tata mester traha dos trabou djis pa por cubri gastonan pasobra, ademas di cheap labor, gastonan pa sustenta un famia ta haltisimo. E consecuencia di esaki ta cu muchanan ta keda pa nan cuenta y mucha pa nan cuenta ta cuminda pa abuso di nos criaturanan, cual ‘nos como gobierno tin deber di proteha’.
Kico ta desaroyo economico?
Desaroyo economico ta e proceso den cual un pais ta progresa den e sector economico, politico, treciendo bienestar social pa su pueblo. Desaroyo economico ta e capacidad di crea mas ingreso pa un pais pa ofrece y/of mantene prosperidad economico y social di su pueblo.
E fenomeno di ‘cheap labor’ no a percura pa un balansa husto. CBS ta confirma cu locual un persona mester pa e por sobrevivi y hiba un bida digno na Aruba ta e suma di Afl 2208,- (bestaansminimum). Un famia di 4, mama, tata y dos yiu, mientrastanto mester di Afl 4638 cada luna pa por tin un bida digno. Un tata cu ta traha dos trabou ganando dos bes e salario minimo no ta ni yega e suma prescribi.
Considerando tur e factornan aki, e ahustacion di salario minimo cu 3% no ta suficiente pero e ta un comienso den e bon direccion, segun e comunicado.
Den e maneho di gabinete Wever-Croes y Minister di Asuntonan Social y Labor, Glenbert Croes, ta pone tur cos den perspectiva. Gobierno di Aruba ta considera e interes di e dunado di trabou, como tambe di e empleado cu ta gana salario minimo. Gobierno t’ey pa traha pa interes di tur sector. Esey ta e punto di salida den tur decision di gobierno.
