Un ley nobo na Filipinas ta rekeri tur studiante graduando di scol secundario, y tur studiante di universidad, pa planta sikiera 10 mata cada un, prome cu nan gradua.
E ley ta formalisa un tradicion di planta mata ora di graduacion, cual tambe ta spera di combati cambio climatico. E proponentenan di e ley ta bisa cu e legislacion por resulta den casi 525 biyon di mata planta den e region, si adheri apropiadamente na dje.
Representante di partido Magdalo na Filipinas, Gary Alejano, kende tabata e autor principal di e legislacion, a bisa: “Cu mas di 12 miyon studiante graduando di scol basico, casi cinco miyon studiante graduando di scol secundario, y casi mey miyon graduando di universidad cada aña, e iniciativa aki, si implement’e bon, lo sigura cu sikiera 175 miyon mata lo wordo planta cada aña.”
Noticiero CNN na Filipinas a bisa: “Hasta si unicamente 10% sobrevivi, esaki ta nifica cu lo tin 525 biyon arbol disponibel pa hubentud por disfruta, ora nan asumi liderazgo den futuro.” E matanan lo ser planta den mangel, boske existente, algun area protegi, areanan militar, minanan bandona, y areanan urbano selecta, segun e noticiero.
Gobierno a bisa cu e especienan selecta pa planta mester ta apropia pa cada ubicacion, clima y topografia di e area, y tambe lo tin preferencia pa especienan indigeno.
Ademas di e impacto inmediato pa absorbe carbon cu e matanan, ta spera cu e legislacion lo yuda trece comprension ambiental na generacionnan futuro, y conduci na mas iniciativanan ecologico.
Departamento di Educacion di e pais, y e Comision riba Educacion Avansa hunto lo implementa y sigura cumpliemento di e ley.
Filipinas ta un di e paisnan mas severamente deforesta, cu un cantidad di cubierta forestal cu a cay for di 70porciento na apenas 20 porciento durante siglo 20. Cortamento ilegal di mata ta keda un problema den e pais, y e falta di mata den algun area a exacerba e riesgo y impacto di inundacion y derame.
