Dos bom cu a explota den un lapso di par di minuut a destrui e catedral catolico na e isla di Jolo, den sur di Filipinas. E explosionnan a causa por lo menos 20 morto y 111 herido entre esunnan atendiendo misa di diadomingo, segun funcionarionan gubernamental. Militantenan Musulman tabata activo anteriormente caba den e region.
Testigonan a bisa cu e prome explosion den e catedral di e capital provincial a haci cu e creyentenan a core sali di e edificio. Militar y polis a cuminsa drenta e catedral ora un di dos bom a explota como un minuut despues di e prome, den cercania di e entrada, causando mas morto y herido. Militarnan a cuminsa investiga si e di dos bom tabata pega nan un motorcycle para cerca di e entrada.
E explosion inicial a plama e bankinan di palo paden y a kibra e bentananan di glas, mientras cu e di dos explosion a manda restonan humano y escombro pa e plaza dilanti di e catedral, segun testigonan. E testigonan cu a papia cu Associateed Press no kier a duna nan nomber o tabata mucho ocupa na e escenario di e desastre.
Polis a declara cu entre e 20 mortonan tabatin cinco militar y 15 civil. Entre e heridonan tin 17 militar, dos polis, dos persona di guardacosta y nobenta civil.
Isla di Jolo tabata conoce pa basta tempo problema cu presencia di e milicia di Abu Sayyaf, cu ta marca como organisacion terorista pa Merca y Filipinas, pa atentado cu bom, secuestro y decapitacion di victima. Un obispo Catolico, Benjamin de Jesus, a ser tira pa militante di e organisacion pafo di e mesun catedral na 1997. No tabatin ningun anuncio ainda di responsabilidad pa e atake.
