Informacion cu a yega na nos mesa di redaccion ta indica cu awe tabatin un situacion na e aeropuerto caminda tabatin filanan largo di pasaheronan ta warda pa por pasa proceso di inmigracion pa por aborda nan vuelo.
Imagen cu Bon Dia Aruba a ricibi ta mustra un cantidad di pasahero para den fila ta warda pa por pasa e proceso di inmigracion. No tin informacion confirma di kico tabata e situacion cu a pone cu tin fila asina largo di pasahero wardando, pero un ciudadanonan a expresa nan frustracion pa e situacion cu tabata andando.
Manera ta conoci Aruba ta den pleno high season y ta custumber cu esaki ta un di e lunanan cu mas turista ta bishita Aruba. Historicamente e ta un trend y Aeropuerto Internacional Reina Beatrix ta na altura di esaki y sa cu ta di spera un fluho significante di hende cu ta drenta y sali for di e isla.
Hopi ta cuestiona pakico no ta prepara debidamente, sabiendo cu high season ta den full swing, pa pasaheronan cu ta biaha no mester tipo di inconvenientenan asina ki.
No ta prome biaha cu esaki ta sucede, den pasado caba e sistema di aeropuerto no a funciona optimal loke a causa cu pasaheronan tabata keda pega den fila ta warda pa nan por pasa henter e proceso necesario prome cu nan por subi avion.
E situacion aki ta señala un iregularidad den e falta di preparacion di parti di e personal concerni pa loke ta logistica di e funcionamento di cada pieza pa sigura cu e procesonan necesario ta cana debidamente y cu no tin ningun situacion ta presenta na unda pasaheronan ta perde tempo ta warda den fila cu consecuencia cu lo por hasta perde nan vuelo pa motibo di e tempo di espera.
