Ayera minister di Infrastructura Benny Sevinger hunto cu prome minister Mike Eman a anuncia cu den cuadro di Green Corridor lo bin un fietspad di 10 km.
Bon Dia Aruba a publica caba tocante e fietspad den cuadro di un plan grandi di gobierno pa amplia e camindanan pa core bais y conecta nan cu otro full rond Aruba. Esaki gobierno a presenta durante un encuentro cu e comunidad di ciclista un par di luna pasa den presencia di sr. Eman. E ora nan a bisa cu e fietspad na Green Corridor lo tin un distancia di algo mas cu 6 km, pero ayera a anuncia cu e caminda aki lo bira mas amplio, esta e 10 km.
E caminda special pa bicicleta ta cuminsa net banda di e rotonde grandi di Ser’i Teisjie, den e vegetacion, segun gobierno. E ta un via, minister Sevinger ta bisa, cu por wordo uza tanto door di esnan cu ta recrea of cu ta practica ciclismo. “E ta un proyecto importante pa nos salud, pa esnan cu kier recrea riba un area di 10 km riba Green Corridor. E ta mas largo, ora e wordo conecta riba Watty Vos Boulevard, cu ta pasa rond di Oranjestad, cu ta encera otro 8 km. Si bo conect’e riba Linear Park, banda di aeropuerto, e ta yega te na Faro, ora cu e ta completamente cla y ta encera mas di 25 km straight cu por wordo cori di un punto pa otro. Tambe e por wordo conecta cu San Nicolas y por yega te na 30 km.”
E proyecto aki, e mandatario a bisa, ta uno hopi importante pa stimula mobilidad di ciclismo na Aruba, alabes brindando esnan cu ta practica e deporte aki mas siguridad den nan movecion. Esaki pasobra e caminda ta separa di unda automobilistanan ta move.
Den cuadro di e proyecto aki Odinsa, e compania Colombia cu ta ehecutando e proyecto di Green Corridor, a informa Gobierno cu nan ta bay regala 1000 bicicleta na muchanan di Aruba na momento cu nan entrega e proyecto aki den luna di augustus awor.
