Loke mester a bira un fiesta grandi den parlamento pa celebra reapertura di e refineria, no tabatin e ambiente festivo completamente. Den e reunion pa aproba e ley, poco, poco, hasta algun miembro di e partido di gobierno a haya curashi pa trece dilanti algun inkietud encuanto e riesgonan ambiental cu e refineria, miho bisa e upgrader lo trece cu ne.
Gradualmente a cuminsa ‘sink in’ e idea cu, manera nos a trece dilanti ampliamente, ta existi e posibilidad cu e upgrader ta bay opera sin restriccion ambiental y sin gas natural. Specificamente e fraccion di un persona di Marisol Tromp tabata categorico den pregunta riba esaki. E realidad ta cu, despues cu parlamento ta bay di acuerdo cu e ley pa traspasa e propiedad di e refineria den su totalidad pa Pais Aruba, ta nos gobernacion ta asumi responsabilidad pa e consecuencianan pa casi tur aspecto ambiental, pasobra den e ley e cosnan aki no ta regla. Ademas di e garantia den e acuerdonan cu ta Aruba ta asumi consecuencia pa cambio di ley o regulacion cu tin daño financiero pa e operador nobo.
Ta di lamenta cu tambe oposicion a warda te ayera pa cuminsa haci preguntanan critico encuanto henter e aventura aki. Awor no mas ta tende di nan preocupacion pa e deal cu sigur riba diferente tereno ta mustra dudoso. Asina por ehemplo a bin pregunta di banda di PDR pa ministro encarga cu energia tocante e ‘landfill’ cu a acorda pa almacena desperdicio di e refineria, riba cual no tabatin un contesta contundente di e ministro.
Esaki ta grave sigur si tuma na cuenta cu un upgrader ta bay laga mas desperdicio atras compara cu e proceso anterior, unda e residuo di e destilacion tabata bay pa e ‘delayed coker’. Esaki ta converti e material entre otro den ‘petcoke’ cu naturalmente ta contene un cantidad grandi di desperdicio dañino, metalico entre otro. Nos no ta preocupa cu esey pasobra e sushedad ey ta bay otro luga y en todo caso nos no ta keda cu ne. Pero si den e caso cu nos ta keda cu mas desperdicio den futuro, esaki ta un paso atras ambiental hopi grandi pa cual e responsabilidad ta core pa tur esunnan cu vota na fabor!
Tambe a hala nos atencion con naief mayoria di parlamentario ta ora ta trata e asunto di empleo den e upgrader. Con den bo santo inocencia bo ta kere cu e compania pa opera un upgrader ta practicamente emplea mes hopi hende cu Valero den su tempo bon? Y di unda a sali cu tur hende ta competi cu otro pa menciona cifra mas halto pa e cuponan di trabao permanente cu esaki ta bay genera, sin ningun base den realidad?
Ta parce cu mayoria a lubida caba cu e plannan pa desisti di desmantelacion y busca un acuerdo cu Citgo a surgi na momento cu mester a para e ambicionnan grandi di e ministro encarga cu turismo, cu tabata menasa, en todo caso segun e ministro ‘gobernador’ di San Nicolas y e prome ministro, di ‘take over’ San Nicolas como teritorio politico. Mester corda con e ministro gobernador a cay den voto na San Nicolas na 2013 siendo ministro di Finanzas y responsabel pa e problemanan grandi financiero di Pais Aruba. A obliga su persona pa hala atras y laga otro persona asumi responsabilidad pa e cartera aki. Un aña pasa su futuro politico tabata colga na un hilo ainda, pero e caracter tradicional di politica a vence! No ta mishi den ‘cura’ di otro! Y mucho menos si e PM tambe tabata core riesgo di perde voto na San Nicolas. Ironico por lo menos y talbes hopi dañino ta si futuro di un pais no ta depende di strategia economico bon pensa, pero ta basa riba oportunismo y conflicto politico interno.
Cu oposicion ta reclama nan papel den reapertura, esey ta keda na nan pero ta straño si cu nunca nan a critica cu e partido den gobierno a cuminsa actua puramente a base di un conflicto interno cu e aña aki a hiba hasta na un biahe pa bishita Gobernador. Pero mas lamentabel ta cu pasobra no tabatin un acompañamento critico den henter e proceso di negociacion riba e aspectonan importante, cu awor no mas ta bin dilanti y cu e tratamento den pura ta haci cu no tin tempo pa trata e asunto na un manera debido.
Manera e unico politico den parlamento cu tin su dudanan serio riba henter e deal a trece dilanti, ta remarcabel con simannan largo a dedica tempo y esfuerso pa un asunto manera e famoso amienda encuanto pareha di mesun sexo, mientras awor pa algo cu por tin mucho mas consecuencia serio pa nos futuro, ta purba bulldoze e asunto den un solo dia, desrespetando derecho fundamental di parlamento pa informa su mes debidamente. Problema ta keda cu mayoria di parlamento no ta mira cu nan no tin solamente un derecho, sino mas bien un obligacion di informa nan mes debidamente. Nos mester siña biba cu e debilidadnan aki?
