Dianan di fiesta di Pasco y Fin di Aña a caba y por a ripara cu algun ciudadano no ta piki nan sushi ora di bay pasa un dushi dia den lama.

Asina a reporta e colega Hilario Doncker riba su rednan social, na unda el a informa cu tabatin cantidad grandi di sushi benta na area di Rodgers Beach y Baby Beach e dia di ayera den oranan di atardi.

El a expresa cu el a haya confronta cu un sorpresa desagradabel ora el a bay landa y a topa cu e sushedad aki, pa cual el a purba di haya drumnan pero esey a wordo kita for di area di Rodgers Beach. “Tumando na cuenta cu tabatin basta hende riba beach, e chens ta grandi cu e beach lo keda cu hopi sushi atras,” Doncker a skirbi.

Ta importante pa trece dilanti cu dianan pasa, tambe a reporta sucesonan similar den area di Parke Arikok, specificamente na Vader Piet, na unda un turista a reporta esaki riba rednan social, loke a causa un mal impresion pa nan cu ta bin Aruba di vakantie y ta haya benta basta sushedad den un area hopi turistico.

Bon Dia Aruba tambe a informa dianan pasa riba un situacion similar na un luga denomina Guadalajara, na unda ciudadanonan ta yega pa admira e bista cu tin di areanan di Santa Cruz, Playa, te hasta Piedra Plat, Paradera y Noord, asina como tambe e famoso sero Santa Ana di Venezuela.

Den area aki, a haya un cantidad di sixpacks di cerbes como otro tipo di desperdicio, cu ora e personanan ta yega na e luga pa comparti cu amigonan of famia, ta consumi e bebida aki; pero ta lubida di recoge tur e sushedad aki y hib’e te un dump.

Ta basta preocupante con e situacion aki ta birando normal cada dia mas na diferente luga di nos isla, un aña nobo a cuminsa na unda por compronde cu hende kier a celebra e motibo di ta na bida door cu nos isla te ainda ta confronta cu pandemia di Covid-19, pero tambe mester ta consciente di e dañonan y mal impresion cu e actitud ta duna pa nos pais y turista cu ta esunnan cu ta forma parti di nos pilar economico. Ban bira mas consciente y cuida naturalesa, si kier celebra cu famia y amigonan, haci’e pero piki e sushinan bek y no lag’e benta pa contamina ambiente.