Fiscal y gruponan defensor di derecho humano ta bati alarma tocante e condicion di bida den prizon na Haiti, un di e paisnan mas pober rond mundo y afecta pa un crisis politico.
“Ta e pio tasa di morto sin ningun splicacion cu mi a haya rond mundo” Jhon May, un docter Mericano ta bisa. May a funda e ONG Health Through Walls, pa mehora tur condicion den prizon den Caribe y na algun pais di Africa. Haiti tin cerca di 11 mil prizonero, 80% di nan ta warda pa un condena den condicion dificil manera hacinamento, desnutricion y epidemia di virus.
“Hombernan ta obliga pa biba manera animal, Danton Leger, un fiscal, a denuncia. “Na luna di januari a fayece 21 prizonero pa motibonan cu nos a menciona, na prizon di Port au Prince, capital di Haiti”. Na Haiti prizoneronan ta sufri e mayor congestion di mundo: un ocupacion di 454%, segun Instituto di Investigacion di Politica Criminal di Universidad di Londres.
