(AP) — FIA a rechasa un intento di Ferrari pa elimina un penalty cu a costa Carlos Sainz Jr. e di cuatro lugar den e Grand Prix Australiano.
Sainz a ricibi un penalty di cinco segundo pa a crash den piloto di Aston Martin, Fernando Alonso despues di un restart. E careda a caba riba un buelta cu safety car, pues e penalty a pusha Sainz te na ultimo di e 12 competidor cu a completa e careda, y e no a anota ningun punto.
E veredicto di e stewards ayera ta mustra cu Ferrari a presenta telemetry for di auto di Sainz, un declaracion di e piloto Spaño y comentarionan di otro pilotonan den entrevista pa haci e argumento cu Sainz tabatin tiki grip riba tairanan friu cu solo den su wowo, y no por a slow e auto suficiente pa evita Alonso.
E stewards, incluyendo ex-piloto di Formula Uno, Enrique Bernoldi a dicidi cu “no tabatin ningun elemento significante y relevante nobo” den e evidencia di Ferrari cu no tabata cla caba na momento cu a emiti e castigo na Australia. “E condicionnan di e pista y e taira tabata algo cu tur competidor mester a tene na cuenta y adapta na dje,” segun e veredicto a declara. “Den purba di brake laat mientras tabata core (cu Pierre Gasly), (Sainz) a adopta e riesgo cu e, como piloto, lo por a perde control di su auto. Den e caso aki, e riesgo a materialisa, cu consecuencia cu a bin un colision pa cual ta bin un castigo.”
Ferrari a bisa cu e team tabata “naturalmente decepciona” pa no a ricibi un revision di e castigo y cu lo busca pa reforma con ta otorga penalty den futuro. “Awo nos ta anticipa pa drenta discusionnan mas amplio cu FIA, F1 y tur e teamnan,” Ferrari a bisa, “cu meta pa continua mehorando e vigilancia di nos deporte, pa sigura e nivel di mas halto di husticia y consistencia cu nos sport merece.”
