Hende homber fuente di violencia domesticoBr (1).jpg

Fundacion Pa Hende Muhe den Dificultad (FHMD) ta bin trahando duro pa mas cu dos decada, no solamente pa brinda proteccion na hende muhe vulnerabel victima di violencia domestico, sino pa bin cu un cambio di mentalidad riba e causanan di e problematica aki. Pero ainda e cantidad di caso relaciona cu e problema aki ta sigui aumenta keto bay ariba nos isla.

Coordinador di FHMD, Magaly Maduro, ta declara na Bon Dia Aruba cu a pesar cu e casonan di violencia domestico ta sigui aumenta, nan ta sigui dunando charla manera esun cu nan a organisa diahuebs anochi na MFA-Noord den cuadro di Oranje Aruba 2016.  

E biaha aki e charla tocante violencia domestico a wordo duna fei di perspectiva di hende homber caminda cuater orado masculino a papia riba e tema aki bou e titulo subhetivo “Violencia Domestico: E Homber na palabra”  

Mirando cu e problematica aki ta sigui aumenta nan a inicia e campaña fuerte aki cu ta clausura awe. Durante 15 dia nan a bay diferente escenario cu diferente oradonan y topico pa conscientisa publico cu violencia domestico ta sigui ta un malesa cu ta afecta hopi famia den nos comunidad.

Violencia domestico
Sra. Maduro a señala cu ultimo tempo e cifranan di violencia domestico a bay mas halto. Pero nan no sa si berdaderamente nan a aumenta of cu mas hende a bin afo reconociendo cu nan tambe ta victima of nan ta sufri di un forma of otro, di e problematica aki.

“Cu e ta un tema cu ta taboe den nos sociedad, di esey si nos ta sigur.” E fundacion  aki ta persisti cu e charla aki nan por sigui conscientisa pa kibra e taboe aki y pa nos sociedad por papia habri di dje.

 

Hende homber
Den e charla duna na MFA-Noord a sali afo cu hende homber tambe tin hopi cos cu ta afecta nan, pero nan no ta papia over di dje. Entre nan e presion cu nan tin cu soporta for di cu nan tabata mucha, e sociedad actual unda no solamente hende muhe ta maneh’e sino cu nan a gana un espacio mas grandi. “Ta basta punto pa bin pa dilanti cu sigur nos por traha riba dje”, segun sra. Maduro.

Durante e charla a bin un proposicion pa FHMD habri un hala pa hende homber, caminda entre hendenan homber nan por papia riba e problema di violencia domestico y purba di busca entre nan mes un bon solucion pa elimina e problematica aki. Sr. Maduro a bisa cu e fundacion ta evaluando mas bien pa traha cu diferente partido.

Pero nan no a papia ainda pa habri un hala pa atende cu hende homber. Sinembargo el a indica cu esaki ta algo necesario y cu hopi hende ta consciente di dje. Nan mester evalua si e ta factibel of no y e forma con eventualmente nan lo por bin cu ne. Actualmente nan ta enfocando hopi riba e consecuencia cu tin pa e muchanan.  

E intencion di FHMD ta pa traha hunto cu nos comunidad y instancianan contra e problema aki. E fundacion aki a wordo lanta 21 aña pasa y e casonan ta sigui bin den diferente magnitud te hasta morto. “Si nos kier realmente haci algo na dje, nos tin laga tur e partidonan cu tin di haber cu ne, y scucha nan puntonan di bista pa nos por logra algo”. Sra. Maduro ta kere cu esaki ta un formula cu lo por yuda efectivamente pa combati e problema aki finalmente.

Hende homber y muhe parti di problema
Sra. Maduro a bisa cu nan no kier pinta hende homber den un forma negativo como fuente di violencia domestico. Tampoco e no ta haya cu esaki ta e conclusion di e cuater oradonan masculino cu a papia riba violencia domestico. E ta haya cu tur dos tanto hende homber como hende muhe ta parti di e problematica aki.

Un punto cu sigur e ta haya cu a sali dilanti den e charla aki ta cu bo mester sa na momento di iritacion of rabia pa diferente factor acumula pa algun di e dos partner, con bo mester haci cu esaki y con bo ta atende.

Rol di alcohol

“Bo ta bay bringa of bo ta bay dicidi di papia over di dje?”, e ta bisa. E dialogo y papiamento mester cuminsa pa atende e asunto aki, y sigui evita di punta dede y tira culpa riba otro.

E no ta descarta cu alcohol ta hunga un rol grandi ora cu e hendenan ta confronta e tipo di violencia aki. Informacion di polis ora cu nan ta traha nan rapport ta indica cu sea droga of alcohol ta den wega den gran parti di casonan di violencia domestico. Si esey ta e caso tambe mester cuminsa traha riba e factornan aki pa wak si esaki por yuda pa baha e indice di caso di e tipo di violencia aki.

Educacion
Pero e ta haya cu educacion ta e clave pa coy e toro di violencia domestico na su cacho. Ta importante pa cuminsa papia di e topico aki na nivel di educacion na un edad hopi tempran. Mester cuminsa na scol basico cu muchanan chikito, ya cu algun di nan eventualmente ta testigo di violencia domestico pero nan no sa con pa canalisa nan.

“Nan no sa con pa canalisa e rabia y frustracion y e traumanan cu nan ta pasa. Fei di chikito caba nan ta cuminsa expresa nan mes violentamente”, segun sra. Maduro.  Di e forma aki nos por evita cu ora e mucha aki ta bira un hoben of un persona adulto no bira un agresor potencial den nos comunidad.

Awe ta e clausura di FHMD su campaña Oranje Aruba 2016, y ya caba nan ta trahando riba nan programa pa 2017. Tur informacion cu a sali afo durante e 15 dia di e campaña aki, nan ta bay hinc’e den un programa pa 2017, y bin cu cambio den nan maneho.

E aña venidero e fundacion aki kier bay mas afo y duna mas informacion, specialmente den scolnan cerca cu e muchanan.