Suzy Kock, Presidente di Fundacion pa Hende Muhe den Dificultad ta splica Bon Dia cu a bira custumber pa sociedad keda keto y bira lomba pa motibo di no kier mete den asunto di otro hende y esaki ta algo tipico Arubiano.
“Eigenlijk pa un isla chikito mi ta haya esaki hopi straño , pasobra normalmente nos tur sa kico nos bisiña ta haci pero nos no ta mete, y bo tin diferente persona tambe cu ta parti di e problema cu ta keda keto. Bo tin e sociedad, bo tin e victima cu ta keda keto, e abusado obviamente pasobra no kier wordo gara, si e victima ta mucha e ta keda keto pa e no haci mas duele of e ta cuminsa sinti cu ta e ta e causante di e problema, bo tin e hoben cu ta pasando den un relacion anto tin berguensa di bini pa dilanti y bisa cu e ta wordo abusa y tambe mayornan cu no ta entrega un keho di kico ta pasando cu nan yiu.” Sra. Kock ta splica.
Sra. Kock ta agrega cu asina bo ta mira cu tin diferente aspecto na e un problema eynan. “Sea bo ta un ama di cas of gerente di banco, tur hende ta keda keto no ta importa posicion den sociedad. Ami ta pensa cu esaki tin di haber cu e sentimento cu ta wordo poni den bo cu bo no ta significa nada, e sentimento cu bo no ta sirbi of bo no tin balor cual ta bini di diferente parti pero primordialmente for di e abusado pasobra esey ta parti di e poder cu e kier riba bo”, Sra. Kock ta splica.
Henter e cuenta di abuso domestico of sexual tin di haber cu poder di un persona riba un otro persona segun Sra. Kock ta splica Bon Dia, locual den hopi caso ta pone e victima bira dependiente di e abusado. “Tin un dicho cu ta bisa; “Bisa mi X cantidad di biaha cu mi ta burico y mi ta bay cuminsa pensa cu mi ta burico”, Sra. Kock ta agrega.
Ta tolera abuso manera cu e ta algo normal
Segun Magaly Maduro, Coordinador di Fundacion pa Hende Muhe den Dificultad, e ta kere cu den nos sociedad lamentablemente nos a siña hopi cos den nos cultura cu no ta yudando nos sali for di e problemanan aki. “Bo ta acepta cu hende ta dal bo un wanta y bo ta haci manera esaki no ta maltrato . E violencia den nos comunidad ta casi algo masha comun. Nos ta bisa, “no pusha so e la pusha mi el a druk mi contra muraya anto nada no a pasa mientras e blauw na bo lomba ta bisa henter un otro cos. E ta un berguensa pasobra bo no ta capaz di bringa contra e cos aki cu e la pasa cu bo, pasobra di pafo, bo bida ta ideal”, Sra. Maduro ta comenta.
Ora e prome golpi cay, bo sa cu bo tin cu bay!
Tin biaha segun Sra. Kock locual ta pasa tambe ta cu hopi biaha bo no ta ni ripara pasobra e abusadonan sa di ta e hendenan di mas amabel na mundo. “ Un di e normanan cu nan ta siña nos como hende muhe ta cu nos tin cu carga e cas, nos tin cu zorg pa tur cos ta uni anto con nos ta bay kibra cas?Kico mi ta bay bisa mi yiunan?
“Mester cuminsa enfrenta e cosnan aki como sociedad completo anto e manera cu bo ta haci esey ta door di haci hopi campaña di conscientisacion, locual nos ta bay intensifica aworaki mas hopi. Den sentido cu nos kier mustra e hende muhe su poder, nos no kier mustra cu kier pone e hende muhe contra e hende homber. Nos kier mustra e balor di e hende muhe pa e por para riba su pianan y pa haci e decisionnan corecto pa ora cu e haya su mes confronta cu un situacion potencialmente di violencia domestico, cu e por sali for di dje prome cu e situacion yega na uno grave of ora cu e prome golpi cay, cu bo sa cu bo tin cu bay. Semper e prome golpi ta esun mas dificil pa dal, e di dos ta bini di su mes” Sra. Kock ta bisa.
Tanten cu e persona cu ta abusa no busca ayudo pa e problema cu e tin cu ta causa cu e ta expresa su angustia, frustracion, miedo of kico cu ta den violencia domestico, tanten cu e abusado no haya ayudo segun Sra. Kock e di dos golpi ta bay bini sigur. “E hende muhe mester ta mas sigur di su mes y di ken e ta, e mester sa con pa haci uzo di su derechonan pa e preveni pa e di dos golpi aki bini”, Sra. Kock ta splica.`
