Fundacion pa Hende Muhe den Dificultad a cera nan campaña di conscientisacion ‘Orange Aruba’ cu hopi exito. Ayera nochi na Moustachef Bistro den Havenstraat, nan a firma un acuerdo cu Task Force di traficacion humano na Aruba cual e fundacion ta considera un momento historico cu lo trece hopi cambio.

 

Presidente di Fundacion pa Hende Muhe den Dificultad, Suzy Kock ta splica: “Como parti di e campaña di Orange Aruba 2016, nos a haya mas contacto cu e Task Force di traficacion humano.

Den cuadro di esey nos a ripara cu nos por yuda otro mas hopi.”  Den pasado caba, FHMD a duna opvang  na victimanan di traficacion humano akinan riba Aruba. “Nos a ripara cu no tin suficiente opvang. E ta un problema grandi pasobra nos mes di e fundacion hopi biaha nos ta haya cu mester manda hende cas of pone riba un lista pa warda. For di augustus te awor akinan nos ta completamente yen.”

 

Opvanghuis

Un camber no ta keda bashi pa largo. Normalmente ora cu casonan drastico di traficacion humano tuma luga, e no ta djis un victima so pero seguramente un of mas. Mester opvang pa e hendenan aki anto no tin. Den cuadro cu esaki, FHMD a dicidi di bin cu un proyecto mutuo sosteni pa ambos fundacion pa traha y haci e realidad den 2017 un ‘Multifunctionele Opvanghuis’. “Un luga grandi caminda nos lo por duna ‘opvang’ na victimanan di traficacion humano como tambe abuso domestico. Nos intencion tambe ta pa acerca Imelda Hof pasobra muchanan despues di 18 aña ta sali for di eynan, pues kico ta pasa cu nan? Unda nan ta bay anto con nan ta wordo prepara pa biba den sociedad?”

 

Sra. Kock ta splica Bon Dia Aruba cu FHMD ta bay yena un bashi cu tin awor akinan pa locual ta ‘opvang’ locual ta haci nan masha orguyoso cu Orange Aruba a yuda pa yega na e acuerdo aki.

 

Campaña Orange Aruba

E campaña Orange Aruba a cuminsa riba 25 di november anto caba riba 10 di december. E tabata un campaña pa conscientisa comunidad en cuanto ta violencia domestico y su consecuencianan.

Coordinador di FHMD Magaly Maduro ta bisa: “E anochi na Noord tabata hopi special unda cu e hende hombernan por a expresa nan mes, papia over e problematica, con nan ta mir’e y ki solucion nan ta kere lo ta necesario. Esey tabata un parti cu a resalta hopi den e campaña aki.”

 

FHMD a haya un acogida hopi grandi e aña aki anto nan ta orguyoso pa bisa cu nan a finalisa un 2016 cu hopi exito.