Temporada di carnaval a caba, tin na caminda e festival di Himno y Bandera cu lo tuma luga na maart. E festival ta conta cu 88 participante mucha, hoben y adulto.

Aaron Arenas di comision Promove Cultura a duna di conoce cu for di siman pasa a tuma luga e inscripcion na Tinashi pa locual ta trata e festival di Himno y Bandera. E biaha aki ta conta cu 88 participante.

Participante mucha, hoben y adulto. Arenas ta compara cu e interes pa e festival tabata grandi, cu for di prome momento cu a cuminsa inscripcion ya tabatin persona wardando pa inscribi.

“E tabata un ambiente hopi cultural, tur persona den e mundo di musica, cultura. Nos a scoge bon fecha dedica na Himno y Bandera. Cu esaki ta mira tambe cu tin interes den e festival local”, el a splica.

Por mira e entusiasmo di hende mirando cu no tin mucho festival den e fecha aki, anto e momento ta probecha, manera festival di Dande, Pasco. Por mira cu ta contento pa un festival asina cu hende por comparti cultura tradicional di Aruba.

E aña aki ‘manera tur aña’, e festival lo tuma luga riba Plaza Betico Croes cu tin un espacio pa hopi hende por mira y duna sosten na e musiconan. Tambe lo pone tent rond.

E evento mes lo tuma luga diabierna 6 y diasabra 7 di maart pa categorianan infantil y hubenil, cu ta conta cu un total di 46 participante.

Pa adulto e festival lo tuma luga 11 y 12 di maart cu lo ta e pre-final pa asina duna espacio 14 di maart pa e 20 cantante cu lo presenta na final. Tin un total di 41 adulto y 17 banda, Arenas a splica.

Den caso cu tin empate entre dos cantante, ambos lo pasa pa e final. E ta yega 21 of 22 pero no ta kita e empate durante pre-final. E evento di mucha lo cuminsa di 6pm te cu 12am. Esun di adulto no por garantisa orario.

Arenas tambe a bisa cu di 88 participante, no tin luga pa mas. “E aña ki nos ta estricto cu regla. E mesun dia a acerca y no tin luga pa hinca mucha of adulto. No por agrega mas hende, pero ta pidi si pa esunnan cu t’ey, no cay afo”, e ta bisa.

Pa e dia di evento mes lo tin tent cu cuminda local, artesania y cosnan local pa comunidad por disfruta. Nan kier invita pueblo pa asina duna sosten na cantante ‘cu un publico grandi ta duna animo pa nan canta’. Lo tin 500 stoel disponibel pa publico por sinta. Tambe esunnan cu ta trece nan mesun stoel por haci esey.

Arenas kier gradici Dewit Vandorp cu a contribui pa certificado pa muchanan. Gobierno di Aruba cu Comision di Celebracion Dianan Nacional. E dos comision organisado Ray-anne Hernandez y Jessica Croes. Pa tur e boluntarionan di Comision Promove Cultura y Fundacion Cultura y Festival Folkorico.