Dialuna 20 di november ta Dia di Mucha na Aruba y tambe ta celebra Dia Internacional di Derechonan di Mucha. Directiva di Centro di Bario Playa Pabao pues ta duna reconocemento na nos muchanan den un solo actividad otro siman.
E actividad aki ta tuma luga dialuna dia 20 di november cumisando pa 3’or di atardi te cu 8’or di anochi. E muchanan lo tin e oportunidad pa hunga den e ‘waterslide’, bula riba trampolin y den dinojump, hunga den luchtkasteel, monster truck, pinta cara y participa na diferente wega. Tambe muchanan tin oportunidad pa gana un celular. Entrada ta completamente gratis.
Muchanan ta wordo invita pa bin cu nan trahe di baño pasobra ta bay tin un ‘waterslide.’ Pa 6’or lo cuminsa un ora di locura sigui pa un show ‘Di mucha pa mucha’ cu presentacion di gruponan hubenil di baile; Grupo di Baile Hubenil di Centro di Bario Playa Pabao, Kids 2 Kids, Chaz Dancers, Pierewietje y Flash. Tambe lo tin presentacion di diferente solista hubenil. E prome 400 mucha lo ricibi un recuerdo di e dia aki. Tambe ta bay tin un exposicion por medio di e muchanan di Anglo Kleuterschool cu tin e tema di ‘Dia Internacional di Derecho di Mucha’. Un danki di curason ta bay na Vertegenwoordig van Nederland na Aruba, CEDE Aruba y Asociacion pa Trabao Hubenul Arubano pa nan contribucion na e actividad aki. Lo tin un bar (sin bebida alcoholico) y un cushina cu prijsnan di dia di mucha.
‘Derechonan di Mucha trapa na Aruba’
E aña aki un di e temanan cu a surgi hopi den comunidad tabata esun di abuso sexual di mucha y castigonan cu esunnan acusa ta haya di husticia. Riba rednan social constantemente por a mira ola di reaccion cada bes e tema a bin dilanti te hasta hendenan bisando cu derechonan di mucha ta wordo trapa na Aruba. Comentarionan entre otro den comunidad ta cu na Aruba ta gusta pinta cosnan bunita mientras cu ketobay nada no ta wordo haci pa mehora e situacion.
Nos redaccion tin algun tempo caba ta purbando di haya un entrevista cu Bureau Sostenemi riba cifranan y kico ta e maneho. Mirando cu tin varios keho di casonan cu ta keda pega eynan, cu mester bay Asuntonan Social , Voogdijraad, y despues wordo manda bek di cashi pa muraya.
Director di Centro di Bario Playa Pabao ta bisa cu e meta di e actividad aki ta tambe pa conscientisa mayornan y henter pueblo di e derechonan di mucha. Manera cu a haci aña pasa, ta pone e derechonan skirbi riba un tas cu e muchanan ta bay cas cu ne. Asina ki ta un manera di promove esaki. Centro di Bario Playa Pabao a yega di invita por ehempel e organisacion di Lisette Gomes Contra Abuso Sexual di Mucha pa algun charla cerca nan. Den e sentido ey nan tin comunicacion cu otro. “Nos como Centro di Bario Playa Pabao kier solamente enfatisa riba e derecho di e muchanan. Esey pa nos ta e meta principal. No cu nos ta bay controla cu el a wordo ehecuta manera debe ser, pa esey tambe tin otro organisacionnan cu ta encarga.”
