Diaranson recien, Centro di Bario Playa Pabao a tene un conferencia di prensa unda cu a brinda informacion tocante un grandioso celebracion pa dia internacional unda cu ta celebra e derecho di muchanan.
Manera hopi di nos ta altanto caba, den e weekend binidero lo bay celebra “Dia di Mucha” aki na Aruba. Durante e conferencia anteriormente menciona, a informa cu proximamente den e fin di siman binidero Centro di Bario Playa Pabao lo ta organisando nan celebracion pa cu e dia special aki.
Pa e motibo aki directiva di Centro di Bario Playa Pabao ta duna reconocemento na nos muchanan den un solo actividad grandioso na Playa Pabao.
E actividad aki lo ta tumando luga diabierna dia 18 di november. E actividad lo cuminsa pa 3’or di merdia y lo termina pa 8‘or di anochi. Nos muchanan lo tin e gran oportunidad di disfruta di varios diferente entretenimento cu lo tin disponibel na e sitio. Ta conseha tur e muchanan bini cu nan zwempak pa motibo cu entre otro, e muchanan lo por hunga den “waterslide”, bula riba trampolin y den dinojump, hunga den luchtkasteel, monster truck, pinta cara y participa na den varios diferente wega.
Tambe e muchanan lo tin e oportunidad unico pa gana un celular. E actividad ta dirigi pa mas tanto muchanan di entre 4 pa 12 aña, mirando cu tin wega cu e muchanan lo hunga uno cu otro sinembargo ta duna bon bini ta tur muchanan pa yega e actividad aki cual lo tin un entrada completamente gratuito cu un bar (sin bebida alcoholico) y un cushina cu prijsnan special pa dia di nos muchanan.
Pa 6’or lo cuminsa un ora di locura cual lo keda sigui pa un show “Di Mucha Pa Mucha” cu presentacion di gruponan di baile y solistanan hubenil cu lo deleita tur presente cu presentacionnan unico y memorabel.
Ademas di e informacion general di e actividad, tambe a anuncia cu e prome 300 mucha cu atende e actividad aki lo ricibi un recuerdo di e dia aki den forma di un tas di regalo.
Di e manera aki Centro di Bario Playa Pabao lo celebra Dia di Mucha y lo duna nos muchanan reconocimento riba e dia importante aki. Ta invita un y tur pa uni cu e directiva y laga nos manera un famia grandi asisti na e actividad aki cu nos muchanan na Centro di Bario Playa Pabao.
E directa a expresa “pues mayornan nos ta warda boso y bin compaña bo yiu(nan) na e actividad aki.”
Tambe nan a duna un danki di curason na Vertegenwoordig van Nederland na Aruba (VNO), y Asociacion pa Trabou Hubenil Arubano (ATHA) pa nan contribucion na e actividad aki.
