Festival di Dande ta bay tuma luga dia 27, 28 y 29 di december

Festival di Dande un tradicion cultural pa final di aña na Aruba ta bay tuma luga otro siman unda cu Comision di Celebracion di Dianan Nacional di Departamento di Cultura a señala cu ta contento di por cuminsa promove e festival aki.

E festival lo tuma luga dia 27, 28 y 29 di december na Aruba, igualmente a informa cu pa prome biaha UNOCA ta bay forma parti di esaki hunto cu e comision pa asina ey por engrandece hopi mas e tres festival di Dande.

Lyonel Dirks a bisa cu despues cu nan a sinta cu tur e tres organisado cu ta Fundacion Chico Harms, Comision di Festival Infantil y Hubenil, ademas di Festival Grandi di Adulto -cu ta celebrando nan 50 aña di nan festival- nan a yega na cierto conclusion pa logra pone tur e tres festival hunto pero cu fechanan separa.

Esaki ta pa motibo di por duna na e comunidad di Aruba e tempo pa por celebra cada un festival cu nan concepto diferente kedando riba e tradicion di Dande, pa 27 di december lo tin e festival na Centro di Bario di Brazil organisa pa Fundacion Chico Harms, Chico Harms cu tabata presente den e conferencia di prensa aki y a menciona cu e ta sumamente contento cu e aña aki UNOCA y Comision di Celebracion di Dianan Nacional ta uni pa haci e actividadnan aki lo mas grandi cu ta posibel.

“E ta grandi, sigur, sigur, pero e aña aki mi ta mira cu e ambiente ta mas diferente cu tur aña y esaki mi ta spera cu lo bira un exito sigur”, Harms a comenta.

Di loke ta trata nan show, el a declara cu pa via di e pandemia di Covid-19 cu tabatin, esaki ta di 53 aña cu nan ta organis’e, nan a cuminsa na Colegio Cristo Rey y despues cu sede di bario di Brazil a habri, nan a bay na e sede di bario ey pa lo cual ta bayendo tremendo y e aña aki nan tin 17 grupo cu lo participa “den e festival di Dande cu ta hopi bunita, nos tin cu haci’e pa e muchanan tambe na Tanki Leendert y nos tin cu bay wak con nos ta bay haci’e pa otro aña y nos no por laga esaki cay na ningun momento, esaki ta di nos y nos tin cu keda haci’e”, Harms a expresa.

Na Centro di Bario Brazil lo cuminsa 6.30pm pa motibo cu 17 grupo ta hopi, manera el a sigura, unda tin pensa pa caba entre 12am pa 1am, “nos ta invita e bario di Brazil y tambe Aruba completo pa bin presencia e actividad aki y tambe e otro shownan cu nos ta trahando cu otro organisacion pa e actividad aki keda na bida”, el a finalisa.

Aaron Arenas di Comision Promove Cultura a informa cu pa dia 28 di december lo tuma na Centro di Bario di Tanki Leendert pa celebra e festival di e muchanan y hobennan, tin un total di 20 participante den e categoria di 4 aña pa 6 aña, di 7 aña pa 9 aña, 10 aña pa 12 aña y 13 aña pa 17 aña unda den cada categoria lo consisti sea di un rey of reina, esaki ta bay ta e cuater ganado y di otro categorianan nan lo tin dos luga of tres luga.

E festival aki di mucha y hoben lo cuminsa 7pm cu un total di 7 agrupacion musical unda segun el a bisa, nan ta calcula pa caba 11pm of 12am.

Finalmente pa dia 29 di december lo tin e festival di adulto unda lo celebra nan 50 aña den e Club Caquetio cu lo cuminsa 6.30pm.

Director di Unoca, Ray-anne Hernandez a bisa cu e aña aki nan a dicidi di haci un partnership cu Comision di Celebracion di Dianan Nacional, Departamento di Cultura y Ministerio di Cultura pa asina nan hunto engrandece loke ta e festivalnan di Dande na Aruba, “pa varios aña UNOCA ta yuda individualmente e tres festival aki, tin biaha nos ta haya un so ta aplica, otro aña dos ta aplica, pero e aña aki directiva di UNOCA a dicidi cu nos kier duna realce na nos tradicion di Dande cu ta algo unico di Aruba y pa haci esey nos a acerca Comision di Celebracion di Dianan Nacional pa asina nos yega na e bunita partnership aki”, el a bisa.

Esaki ta pa e tres festival por haya un sosten mas grandi cu nan ta haya normalmente pa loke ta e festivalnan, “nos a ripara cu pa cada aña ta bira un reto pa cada organisacion keda nan mes na nan mesun standard na nivelnan cu publico di Aruba ta spera di loke ta e show y presentacion cu ta wordo duna, pero tambe di loke tin di haber cu organisacion y logistica di e festivalnan, esey tabata un motibo hopi importante pa nos sostene e festivalnan aki pa nos por mantene e nivel y pa nos por sigui mantene e tradicion di nos Dande”, Hernandez a sigura.