Diabierna 17 di januari den Centro di Bario Brazil mester a tuma luga e Festival di Calypso y Roadmarch Infantil y Hubenil, cual a keda posponi pa motibo di awasero. Un actualisacion publica ayera ta indica cu esaki tin un fecha nobo y ta bay tuma luga diadomingo awo dia 26 di januari.
Despues cu a tuma decision pa pospone e Festival di Calypso y Roadmarch Infantil y Hubenil diabierna ultimo, tur hende tabata pendiente pa e anuncio di e fecha nobo pa esaki.
Stichting Maneho di Aruba su Carnaval (SMAC) mester a reuni pa mira e posibel fechanan disponibel pa realisa esaki teniendo na cuenta tur e otro actividadnan di carnaval cu mester tuma luga.
Despues cu e comision di Festival di Calypso y Roadmarch Infantil y Hubenil a reuni cu e mayornan di e muchanan cu lo ta participando pa ricibi nan feedback riba e posibel fechanan cu ta disponibel pa realisa e festival, a tuma e decision pa haci esaki diadomingo 26 di januari.
Mester menciona cu riba e dia aki tambe tin otro actividad musical riba agenda, cual ta e Festival di Tumba Infantil y Hubenil. No ta sigur ainda con ambos evento ta bay tuma luga riba e mesun anochi.
