(AP) – Varios ciudad rond di mundo ta mira transport publico limpi y eficiente como e manera pa disminui nan emicion di carbon. Pa ciudadnan cu curpa di awa, un ferry di tecnologia halto na Sweden por pronto crea un standard nobo.
Operando den archipelago di Stockholm, fabricante di boto electrico Candela su P-12 Vessel no ta haci hopi sonido mientras e ta move riba awa. E desaroyadornan ta spera cu e ferry, cual a ser revela e siman aki, lo trece un era nobo di transport publico riba awa. “Esaki ta un paso padilanti,” Erik Eklund, ken ta encarga di e division di vehiculonan comercial na Candela. “E energia cu ta spaar di e maanera aki ta duna nos e velocidad y rango cu nos tin mester pa esaki por traha riba bateria.” E ferry ta designa pa carga 30 pasahero cu un velocidad maximo di 56 kilometer pa ora, considerablemente mas lihe cu otro ferry di pasahero electrico. E ta logra esaki cu su halanan di fibra di carbon cu ta hisa e boto riba awa.
Candela a informa cu e tecnologia ta reduci e energia pa cada pasahero cu 95 porciento compara cu e barconan di diesel cu actualmente ta transport a pasahero na e archipelago di Stockholm, cual ta crea di miles di isla den e Lama Baltico. Un beneficio agrega ta cu e ferry tin excepcion di e limite di velocidad pa motibo cu e no ta laga olanan atras cu por causa daño na e costa ni otro botonan alrededor.
Te ainad P-12 ta den su fase di test pero ta den plan di cuminsa cu servicio den juli entre Ekero y e centro di e ciudad como parti di un proyecto piloto di 9 luna. E ferry lo corta e tempo di biaha for di Ekero via transport publico di 55 minuut pa solamente 25 minuut.
