Algun tempo pasa, tabatin e noticia di un ferry Venezolano planea pa inicia servicio pa nos isla. Segun e compania mes, tur cos tabata cla cu e autoridadnan concerni na Aruba. Un pa un, e autoridadnan, di transporte y husticia por ehemplo, a desmenti di tin algun informacion di e caso. E pregunta ta cu ken si nan a papia, pa por tin e siguridad cu nan por a cuminsa den un luna caba. En todo caso, henter e asunto a disparce di mapa, hunto cu e perspectiva cu e refineria lo a cuminsa opera, desapareciendo asina e fluho grandi di trahado Venezolano cu lo a bay haci uzo di esaki. Tambe otro aspecto pa contempla, manera e situacion social y politico di e momento na Venezuela, a bira solamente un riesgo mas grandi pa siguridad di nos pais.
Pero, den un situacion normal, cu un bisiña normal, un fast ferry riba costa firme, y aki nos no ta papiando Venezuela so, sino tambe Colombia, lo ta algo valioso y factibel pa considera?
Hopi aña pasa Aruba tabata dispone di e facilidad di un linea di ferry Venezolano, cu tabata conecta nos isla cu tanto Venezuela como Corsou. E barco cu tabata uza no tabatin tanto velocidad, haciendo e biahe algo costoso na tempo. Pero esunnan cu ta corda esey, tabata fada tambe di e duracion di e control di aduana y inmigracion. Esey no solamente na Venezuela, pero tambe na Aruba y nos isla ruman. Sinembargo, a pesar di e inconveniencia aki, tabatin bastante turismo entre e islanan y Venezuela cu e facilidad di bo mes vehiculo. Importante tabata tambe cu tabatin bastante trafico di carga cu tabata uza e ferry pa hiba mercancia entre e diferente hafnan.
Tanto aña despues nos lo mester haci un analisis completamente nobo pa mira si transporte di mercancia ta ‘make sense’. Pa loke ta Venezuela mes nos mester ta bastante cuidadoso, pasobra cu e caida casi total di produccion manufacturera na e pais aki, no tin tanto di ofrece na nos economia. Durante ultimo añanan Venezuela no ta figura entre e partnernan comercial regional importante pa Aruba. Despues di Merca y Hulanda, nos partnernan comercial regional ta Antias (Corsou), Panama y Colombia. Venezuela no ta ni aparece den e prome 10 partnernan comercial di Aruba pa loke ta importacion. Como cu exportacion for di Aruba mes ta un fraccion di loke nos ta importa, ta di supone cu practicamente nada lo bay Venezuela. Ta keda anto turismo, di ambos banda. Interes den turismo for di Aruba pa Venezuela ta actualmente minimo, mirando e situacion di insiguridad cu ta reina den henter e pais. Pero e problema mas grandi ta regla asunto cu e actual regimen dictatorial pa un fluho rapido cu un fast ferry mester, tambe pa salida di Venezuela. Tur cos ta depende di regreso na un situacion normal den e pais.
Y e caso di Colombia awor, algo cu no a ni contempla te awe. Tin varios motibo pa contempla un miho conexion cu e otro pais bisiña aki. E comunidad Colombiano na Aruba ta casi dos biaha mas grandi cu e esun Venezolanono y tin un fluho considerabel di biahero entre nos isla y Colombia. Tambe Colombia ta entre e partnernan comercial mas importante di Aruba, despues di Merca y Hulanda. Hopi industria di e parti central di Colombia a reestablece na costa Caribense pa evita e gastonan halto di transporte di interior te na e puertonan di exportacion manera Cartagena y Barranquilla. Principalmente Cartagena a bira e puerto di salida di container for di Colombia. Sin embargo, mester tene na cuenta cu e distancia pa Aruba ta bastante grandi y talbes menos faborabel pa un fast ferry. E unico puertonan mas cerca ta esunnan di region di Guajira. Lo mester mas investigacion detaya pa por determina si nan por ta un alternativa.
Punto general di preocupacion ta keda, den tur caso tambe entre e islanan, e tramitenan oficial relaciona cu entrada y salida di nos pais. Garantisa un tempo cortico den haf prome cu e barco por sali atrobe, ta exigi di por conta cu suficiente personal di inmigracion y aduana. Si no por cumpli cu esaki y despues di un biahe relativamente cortico tur pasahero ta bin muri dilanti e autoridadnan aki, e no tin sentido cuminsa mes cu e proyecto di ferry.
Pa bolbe un rato na e transporte entre e islanan mes, ta importante señala cu e transporte maritimo por significa un boost importante pa turismo cu tin intencion di bishita mas cu un isla. Te awor esaki a keda limita pa motibo di e costo halto di aviacion entre e islanan. Transporte maritimo mas barata, y cu auto propio, ta mehora grandemente e posibilidadnan. Cu transporte pa costa firme, esaki lo solamente aumenta.
Pregunta ta con gobierno mes lo bay responde riba e necesidad di mas personal na e cuerponan uniforma envolvi, si presupuesto di baina ta cumpliendo cu e normanan di reduccion di personal planifica. Esaki lo por solamente si e beneficionan directo y indirecto di e transporte nobo aki ta asina grandi, cu gobierno tambe ta probecha mas via entrada portuario.
