“Nos ta e promenan cu a sinti e efecto economico di Covid19 y seis mil trahado den e sector di horeca ta depende di FASE y e subsidio di salario. Sin e asistencia aki, hopi restaurant lo mester cera nan porta y mas hende ta keda sin entrada,” ta locual Daniele Ferrara di e Asociacion di Food & Beverage di Aruba a bisa.
Ferrara, na nomber di e negoshinan cu e ta representa a urgi Prome Minister Evelyn Wever Croes pa tuma e condicionnan di Hulanda pa asina Aruba por haya sosten financiero. “Asina so nos por scapa e entrada di e trahadonan.”
Ferrara splica Bon Dia Aruba cu e ta compronde cu e condicionnan cu Hulanda a impone tabata secreto y cu Gobierno no por a comparti nan. Sinembargo, “mi ta confia Prome Minister Wever Croes, cu lo no ni considera bin cerca nos si berdad e condicionnan tabata pio cu locual nos por a tende den e presentacionnan.” Al contrario, Ferrara ta bisa cu e consecuencianan di no acepta e condicion y keda sin haya prestamo ta funesto pa miles di famia cu sigur lo keda sin trabou. “Riba dje, segun un encuesta cu a mira riba rednan social, como 70 porciento di respondentenan ta urgi Gobierno acepta e condicionnan.”
Daniele Ferrara a sigui splica cu ta e restaurantnan tabata e promenan pa sinti e efecto di e crisis. Y el a sucede di un dia pa otro. “Nos benta a cay cu 99 porciento. Nos ta den un coremento constante pa sobrevivi. Y nos ta den e situacion aki ya pa cuater luna.”
Segun e presidente di e asociacion, hopi negoshi no por a wanta e presion. “Ta importante pa realisa cu aki ta papia di empresanan local. Ta empresarionan local cu a habri nan negoshinan chikito y awor nan y nan empleadonan ta core riesgo aworaki. Si no ricibi subsidio den e proximo simannan aki, nan lo desaparece.”
Ferrara tin tur confianza cu Prome Minister Evelyn Wever Croes lo tuma e miho decision awe den Conseho di Minister di Reino. “Nos ta confia cu e ta tuma e decisionnan mas corecto pa Aruba. Literalmente aworaki, tur Arubiano, tur instancia ta den su man y nos mester por confi’e.”
