Feria Internacional di Buki na Bogota ta un posibilidad grandi pa Reino Hulandes

Feria Internacional di Buki na Bogota 2016  lo tin como invitado di honor e Reino Hulandes. E feria aki lo cuminsa dia 19 di april y lo clausura dia 2 di mei na Bogota mes.

Director di departamento di Relacion Exterior, sr. Edwin Abath a cualifica e echo aki como un ocasion “hopi special” y cu lo participacion di Reino Hulandes den e feria aki. El a bisa cu esaki ta un feria di renombre y distincion hopi grandi cu e aña aki lo tin como anfitrion e Reino Hulandes.

Feria y Reino Hulandes

Pa tal motibo, ayera Prome Secretario di Embahada di Hulanda na Bogota, sr. Floris van Eijk a realisa un bishita na Aruba caminda el a destaca e importancia y contenido di un evento di e caliber y posibilidad grandi pa e paisnan di Reino Hulandes. E embahada di Reino Hulandes ta encarga cu e organisacion grandi di e feria di e buki, asina sr. Abath a laga sa.

“Pa nos ta un oportunidad pa mustra nos como Reino integra pa cuater pais Aruba, Corsou, St. Maarten y Hulanda”. E ta haya cu esaki ta un oportunidad ideal pa presenta nos mes como reino y tambe pa mustra locual nos tin di ofrece riba tereno di literatura specificamente poesia, literatura infantil, pero tambe riba topico di arkitectura, diseño y urbanismo.

Igualmente e ta haya cu ta un oportunidad pa escritornan Hulandes profila nan mes. Pero tambe e lo ta un oportunidad ideal pa e companianan cu lo ta presente den e feria aki. El a laga sa cu lo ta presente un mision empresarial di 20 compania di Reino Hulandes di cual 13 ta di Hulanda y 7 ta di Aruba y Corsou. Nan ta empresanan di arkitectura, diseño y urbanismo, unda nan lo haci nan presentacion y eventualmente lo surgi negoshi cu nan.

Gran parti di e financiamento di e feria a bin fei Hulanda. Alrededor di 1 miyon Euro a bin fei di Ministerio di Asunto Economico na Den Haag y tambe patrocina pa casi 25 companianan Hulandes entre nan KLM, Shell, etc… cu a duna nan contribucion financiero locual ta haci posibel e participacion di Reino Hulandes den e feria aki.  

Aruba ta representa pa dos hoben talentoso, Rosabelle Illes riba e tereno di poesia y Michael Lampe riba tereno di musical. 

Multi cultural

Sr. van Eijk a indica cu e idea tras di esaki efectivamente ta esun di mustra cu Reino Hulandes ta un sociedad y un reino multi cultural y cu e literatura ta multi cultural tambe. Ta trata di cuater pais, Aruba, Corsou, St. Maarter, pero tambe di Hulanda cu ta e parti Europeo di e Reino cu cada bes ta multi cultural.

El a menciona cu den representacion di Reino Hulandes nan lo tin un escritor di origen Maroco cu a caba di publica su prome buki cu lo wordo presenta den e feria aki. 

E feria aki a nace na 1987, y e ta un feria mixto cu ta convoca publico di tur profiel pa promove e benta pa unidad y cantidad di productonan y servicio di industria editorial of di buki. Kiermen e aña aki e feria ta celebra 29 aña di existencia como epicentro di e mayor oferta literario y di lectura na Colombia.

Na aña 2015 e feria anual aki a registra alrededor di 520 mil persona durante 14 dia locual a nifica un record historico na Colombia.