E di 35 Feria Internacional di La Habana, FIHAV 2017, e bolsa comercial mas importante di Cuba, lo habri su portanan awe, pa mas di 3.000 empresario di 63 pais, pa reforsa su papel como showcase di e oportunidadnan di inversion y negoshi riba e isla.
Den e scenario aki lo tuma lugar mañan diamars, e presentacion di un portafolio di oportunidad di negoshi amplia, integra pa como 450 proyecto, cu ta inclui e sectornan economico di prioridad, segun ministro di Comercio Exterior y di Inversion Extranhero (Mincex), Rodrigo Malmierca.
Fihav 2017, cu ta tuma lugar te 3 di november den e recinto ferial Pabexpo, lo ofrece un portafolio di negoshi enfoca principalmente riba captacion di capital den sector manera industria, agro-alimentacion, turismo, mineria, petroleo, energia renovable y biotecnologia.
Cuba ta considera inversion extranhero e fuente imprescindible pa crecimento di su economia, cu ta rekeri entres US$2.000 miyon y US$2.500 miyon pa aña.
Den e prome seis luna di 2017 a aproba diesun proyecto di inversion extranhero y reinversion den dos den ehecucion, pa sumanan di mas di US$1.340 miyon, segun Deborah Rivas, directora general di Mincex a conta e revista oficial Juventud Rebelde.
Segun Rivas, tin “avance modera” logrando e ciere di un “cantidad importante” di proyecto cu capital extranhero, dentro y fuera di e Zona Special di Desaroyo Mariel (ZEDM), den energia renovable, turismo, construccion, mineria y industria liviano.
Rivas a splica cu a percura pa diversifica e inversionistanan extranhero y te awor ta figura capital di mas di 25 pais, mas tanto Europeo.
El a señala cu Cuba ta ofrece oportunidad di negoshi den un contexto di “stabilidad politico, huridico y seguridad ciudadano, creciente mercado, interes halto den innovacion y tecnologia limpi” cu e ta considera atractivo pa inversionista nobo, incluyendo esunnan Mericano, aunke nan ta limita pa nan propio leynan.
Den e sentido ey, e directora di Mincex a subraya cu e blokeo cu gobierno di Merca a impone riba e isla “semper tabata un obstaculo pa desaroyo di inversion extranhero na Cuba.”
Cuba tin pensa di bay mustra su bienes y servicios den un pabeyon cu lo alberga mas di 300 empresa y entidad di tur sector economico, incluyendo e Zona Special di Desaroyo Mariel, e proyecto estelar di gobierno pa atrae capital extranhero.
Den e edicion aki di Fihav, 16 nacion lo asisti cu pabeyon oficial, entre nan Francia, Alemania, Hapon, Corea di Sur, Venezuela, Brasil, Mexico, Chile, China, Rusia y Spaña, e ultimo aki ta ripiti como e pais mas representa cu 75 empresa cu lo mustra nan producto den cuatro pabeyon.
Spaña ta e pais cu mas empresa mixto na Cuba, y ta su tercer socio comercial, cu un intercambio di US$1.300 miyon na 2016, tras di China y Venezuela solamente.
