Den cuadro di Fundacion Lanta Papiamento (FLP) su 10 aña di existencia y 16 aña di oficialisacion di Papiamento, diadomingo ultimo e fundacion aki a organisa un gran Feria di Papiamento na Centro di Bario Playa Pabou.

Tabatin un variedad di actividad, entre nan mercado di buki caminda diferente autor tabata presente cu nan obranan mas reciente. Tabatin seso sport, wega di Papiamento, skina di cuenta, declamacion Arte di Palabra, show di baile, charla y hopi mas. Pa e ocasion special aki e talentoso musico Jersey Sofia a composita su tumba Papiamento dedica na e feliz memoria di Bernadina Growell. Y pa cera e anochi aki, Grupo di Betico a deleita henter publico.

Lema nobo
Tanto minister di enseñansa, Rudy Lampe y su colega di cultura, Xiomara Ruiz-Maduro a presenta den e feria aki. Minister Lampe a felicita FLP pa e iniciativa di e feria. E mandatario a elogia e participacion di hopi hende den e seso sport cu nan a organisa.

Tambe den e feria aki a keda introduci e lema nobo di e fundacion aki: “Nos Papiamento, nos derecho.” Segun minister Lampe a declara na Bon Dia Aruba, esaki ta un expresion sumamente na su luga. Ya cu e ta derecho di un pueblo pa cultiva, desaroya su mesun idioma.

Di otro banda, minister Ruiz-Maduro a bisa cu Papiamento ta forma parti di nos cultura. “Cultura ta loke ta fiha nos caracter como pueblo,” el a declara na e matutino aki. El agrega cu Papiamento tin su rol special riba tereno di cultura.

E mandatario a expresa palabra di gratitud na FLP pa nan prome decada di existencia trahando pa e reconocimento y balor di Papiamento tur dia. El a elogia e trabou cu FLP ta bin realisando pa nos por ser conoci cu nos mesun lenga pa medio di bukinan, musica, custumber, etc.. “Pa tur esaki nos tin palabra di gratitud pa e fundacion cu ta haci e parti aki”, el a bisa.

Metanan FLP
Presidente di FLP, Eduard Pietersz a referi cu e fundacion aki a keda lanta 10 aña pasa, exactamente dia 22 di mei, pa medio di un actividad popular na Centro di Bario Playa Pabao.

El a expresa cu Papiamento ta forma parti di tur aspecto di nos bida, y nan kier a expresa esaki pa medio di un feria di Papiamento. Rond di esaki nan a organisa diferente actividad recreativo entre nan cantica, declamacion, arte de palabra, etc.. ‘pasobra Papiamento ta tur caminda.”

Nan meta principal ta pa conscientisa Aruba riba Papiamento como idioma oficial hunto cu Hulandes. Pero tambe Papiamento ta e lenga materno di un mayoria di nos poblacion. Igualmente banda di conscientisacion FLP ta percura pa desaroyo di Papiamento por tuma luga riba nos pais y tambe mehora status di Papiamento no solamente local sino den reino Hulandes.

Den cuadro di desaroyo di nos lenga materno, FLP kier institui un academia di Papiamento. Pa lanta un instituto academico asina cu e esfuerso di nos tur, y muy particularmente di nos gobernantenan, FLP tin un acuerdo di cooperacion (MoU) entre e tres isla ABC (Aruba, Bonaire y Corsou) pa traha hunto riba e tereno aki.