Ayera riba e fecha di 29 di april 2024, Fepoh a celebra su 50 aña di existencia caminda e fundacion aki a logra hopi cos bunita y necesario pa su clientenan di 0-100+ aña, pero cu ainda tin hopi reto pa sigui brinda e miho calidad pa tur persona cu problema di oido y di papia.

Fepoh a lanta riba 29 di april 1974 despues di un epidemia di Rubella (rode hond), na unda a nace hopi baby sordo sin cu tabata tin un instancia pa sostene e tipo di diagnosis aki. E tempo aki Fepo (ainda sin e [h]) tabata haci chekeo di oido y tabata asisti den stimulacion tecnico door di bestel y duna cliente aparato di oido.

Den e mesun temporada a habri Scol Scucha Nos pa percura enseñansa na muchanan cu problema di oido.

Recientemente Fepoh a añadi un [H] na su nomber como parti di e rebranding, na unda ta enfatisa banda di oido riba e area di papia.

Actualmente nan tin un trahado administrativo, un acupedista, un logopedista/manager, un maestra cu specialisacion cluster-2, un maestra di lenguahe di seña/ specialista baby- en kindergebaren y un leerkrachtondersteuner.

Algun aña atras Scol Scucha Nos a cera, na unda e team di guia mester a cuminsa traha ambulante y nan ta bay na scolnan na unda e muchanan ta acudi. Ademas, Fepoh ta traha tambe den intervencion trempan na unda ta sostene famianan di muchanan entre 0-4 aña.

Recientemente Fepoh a informa cu nan a specialisa su mes riba e topico di trastorno den desaroyo di idioma (TOS), na unda a cera un acuerdo den cuadro di profesionalisacion cu ‘Royal Kentalis International’.

“Fundacion Fepoh ta creciendo basta lihe” caminda nan ta sigura cu e reto pa futuro ta pa amplia nan personal den departamento di audiologia pa sigui asisti y conscientisa den area di chekeo di oido y asistencia tecnico.

Ademas, nan mester di mas personal pa garantisa e sosten y guia na e grupo di 80 mucha cu problema di oido cu tin actualmente na Aruba, tambe mester amplia cu un trahado social pa guia mayor- y e netwerk di muchanan cu problema di oido y pa sostene e adultonan cu mester di cualkier ayudo.

Nan ta gradici comunidad di Aruba pa kere den nan den tur e tempo aki y pa sostene nan den e retonan pa futuro, “boso ta duna nos motibo pa sigui padilanti pa un miho futuro,” nan a sigura.

Potret ta cortesia di Royal Kentalis International su website.