Bob, un pushi cu su relacion cu un adicto di heroina den recuperacion kende a adopt’e a inspira e buki y pelicula ‘A Street Cat Named Bob’, a fayece. E tabatin sikiera 14 aña di edad.
Editor Hodder & Stoughton a bisa ayera cu Bob a fayece un dia atras. A bisa den un declaracion cu e tabata ‘un pushi extraordinario y lo haya su falta tremendamente’.
Bida di Bob a hib’e for di cayanan di London na tapeit cora di premiere di pelicula como un strea. Musico James Bowen a haya e pushi oraño bandona y herida na 2007, y a adopt’e. Pronto e pushi tabata compaña Bowen mientras e tabata toca musica riba caya y bende The Big Issue, un revista cu ta genera entrada pa hende sin hogar, rond di e capital Britanico.
E par a atrae atencion, un corant local a conta nan storia, y Bowen a sigura un contract pa un buki. ‘A Street Cat Named Bob’ a wordo publica na 2012 y a bira un best-seller Britanico. Esaki a sigui cu ‘The World According to Bob’, ‘A Gift from Bob’, y ‘The Little Book of Bob’. Hunto, e cuatro buki a bende mas di 8 miyon copia den 40 idioma, e editor a bisa.
‘A Street Cat Named Bob’ a wordo traha den un pelicula cu e mesun nomber, cu Luke Treadaway como Bowen y Bob como su mes. E secuela, ‘A Gift from Bob’ ta programa pa sali e aña aki.
Bowen a bisa den un declaracion: “Bob a salba mi bida. Ta asina simpel.”
“El a duna mi hopi mas cu compania”, Bowen a bisa. “Cune band’i mi, mi a haya un direccion y proposito cu mi tabata falta. E exito cu nos a logra hunto a traves di nos buki y pelicula tabata milagroso. El a conoce miles di hende, toca miles di bida. Nunca tabatin un pushi manera e. Y nunca lo tin. Mi ta sinti cu luz a sali di mi bida. Mi nunca lo lubid’e.”
