Feeder nobo entre WEB Balashi y WEB Onderstation Zeewijk oficialmente den servicio

Despues di un aña di trabounan intenso, WEB su proyecto conoci como “Green Corridor Replacement and Upgrading existing Valero Feeders” a keda finalisa. E proyecto ta encera dos kabelprincipal cu desde aña 1994 ta suministra coriente na nos refineria y area di San Nicolas.Como parti di e proyecto, tambe a reemplasa kabelnan di fibra optico cu ta percura pa e comunicacion di sistemanan entre e ‘substation’ di San Nicolas y WEB. Durante un ceremonial oficial ayera na WEB a pone e ‘Feedernan’ nobo den servicio. Den cuadro di e proyecto, a otorga un donacion na Pasadia Briyo di Solo, Fatima College y Scol Preparatorio Prome Paso.

 

 

E proyecto completo a rekeri un inversion di 10 miyon florin. Parti di e trabounan realisa pa cu e proyecto  aki tabata, e reemplaso di e kabelnan bieu cu kabel nobo, pero tambe un realocacion di e kabelnan aki ya cu unda cu nan tabata situa, actualmente ta interveni cu e proyecto di “Green Corridor”. 

 

Un team cu ta consisti di empleadonan di diferente departamento di WEB a logra realisa e tareanan di e proyecto den tempo record, cumpliendo asina cu tur rekisito y standard. Esaki nan a haci cu partnernan principal, Twentsche Kabelfabriek (TKF) y GSF INFRABOUW (C2). 

 

E kabelnan nobo tin un capacidad di 58MW, cual ta mas tanto cu e kabelnan bieu (33.6 MW) y tin menos efecto riba nos medio ambiente. E kabelnan bieu tabata haci uzo di zeta pa isolacion y cu e instalacion di e kabelnan nobo esaki tambe a cambia. Di e forma aki WEB ta sigui opera segun su vision di traha na un manera mas consciente pa cu nos medio ambiente, mas eficiente, limpi y mas sostenibel.

 

Gerencia di WEB ta satisfecho cu e proyecto cu a keda realisa den transcurso di un aña y ta gradici habitantenan di San Nicolas, Savaneta y Pos Chikito pa e pasenshi y comprension durante e periodo di construccion. Tambe gerencia ta gradici e teamnan di WEB cu di un of otro forma a aporta na e proyecto aki. A pesar di contratiempo pa motibo di condicionnan di tempo y vandalismo, hunto a logra concretisa un otro proyecto exitoso pa comunidad di Aruba.