Roger Federer lo ta ausente di French Open y no menos cu otro tres torneo mientras e ta keda un banda pa sikiera cuatro luna despues di ricibi cirugia arthroscopico na su rudia banda drechi.
Ta apenas e segundo operacion cu Federer, di 38 aña di edad ta ricibi – e otro tabata su rudia banda links na 2016 – y un cu sigur lo genera pregunta riba su futuro den tennis.
El a post riba rednan social diahuebs cu su rudia ta un problema ‘pa algun tempo’.
“Mi tabata spera cu e lo disparce”, el a bisa.
E homber cu a pasa mas siman den rango No. 1 cu cualkier otro, y doño di e record di 20 titulo Grand Slam, a bisa cu e operacion tabata na su pais natal Suisa diaranson. Actualmente e tin rango No. 3 tras di rivalnan Novak Djokovic y Rafael Nadal.
“Despues di e procedura, e dokternan a confirma cu tabata lo corecto pa haci y tin tur confiansa di un recuperacion pronto”, Federer a skirbi.
El a tuma un break e ultimo seis luna di e temporada despues di su cirugia riba su rudia links cuatro aña atras. Ora el a bolbe, el a gana Australian Open y Wimbledon na 2017, despues atrobe Australian Open na 2018, su campeonato mayor mas recien.
Luna pasa na Melbourne, Federer tabata afecta pa locual el a bisa tabata un lesion di musculo di groin. E tabatin mester di elimina shete match point pa derota Tennys Sandgren den cuart final, despues claramente no tabata su mes durante un perdida den set consecutivo contra Djokovic den semifinal.
Awo Federer, kende pa añanan a enfrenta pregunta tocante con largo e lo sigui competi, lo perde torneonan proximo riba cancha duro na Dubai, Indian Wells y Miami, hunto cu locual tabata supone di ta un partido di exhibicion cu a schedule di nobo na Bogota, cu a ser cancela na november pa motibo di disturbio den e ciudad Colombiano.
Tambe e lo ta ausente na Roland Garros, e proximo torneo Grand Slam, cu ta cuminsa dia 24 di mei. Esaki ta nifica cu esaki lo ta e di cuatro biaha den ultimo cinco aña cu Federer ta ausente di e mayor den cancha di klei cu el a gana na 2009 pa completa un Grand Slam den su carera.
French Open ta e unico titulo mayor cu el a gana unicamente un biaha; de hecho, ta e unico cu e no a gana sikiera cinco biaha.
Federer a cera mensahe ayera bisando: “mi ta wak boso riba yerba!” Esey ta e superficie riba cual e tabata mas excelente, incluyendo un record di ocho campeonato na Wimbledon, unda e tabata finalista na cuatro ocasion. Esey ta inclui na 2019, tempo cu el a tene dos punto di campeonato den e final contra Djokovic prome cu a perde e tiebreaker den di cinco set.
E competencia ta cuminsa na All England Club dia 19 di juni. Federer usualmente ta warm up pa Wimbledon na e torneo riba yerba na Halle, Alemania, cu ta cuminsa dia 15 di juni. El a gana 10 titulo na Halle.
