Congreso Constitucional number 24 di FTA lo tuma luga otro siman dia 15 di september manera nan a anuncia ayera durante un conferencia di prensa.
Hose Figaroa vice-presidente di Federacion di Trahadornan di Aruba (FTA) a splica cu esaki ta bay trata di un conferencia y alabes un congreso, nan a scoge e tema di “Flexibilidad Laboral” pa e conferencia na unda cu Figaroa a menciona cu un di exigencianan cu nan a wak den e Landspakket na unda Hulanda a fia Aruba cierto suma di placa relaciona cu e crisis di Covid-19, ta papia di entre otro un flexibilisacion di mercado laboral na Aruba.
“Nos a haya esey interesante pa discuti den e conferencia cu ta bay habri nos congreso”, el a bisa.
Di parti di nan como sindicato y como representantenan di trahado, Figaroa a comenta cu nan no ta 100% di acuerdo cu interesnan di dunadonan di trabou, caminda cu nan ta sinti cu tin un tendencia di flexibilisacion hopi mas fuerte di lo cual nan como sindicato ta dispuesto pa papia over di dje.
Den e perspectiva ey, nan a dicidi di trec’e esaki como tema y invita oradonan cu experiencia internacional pa asina nan duna nan punto di bista con nan ta mira flexibilisacion na un nivel mas halto.
Nan lo conta cu e presentacion di Maria Helena André, director di Oficina di Asuntonan di Trahador (ACTRAV) di Organisacion Internacional di Labor (ILO), Arthur (Tuur) Elzinga, presidente di Federatie Nederlandse Vakbeweging (FNV) y Salim Kalkach Navarro, sub-secretario di Confederación Revolucionaria de Obreros y Campesinos (CROC) Mexico y Tesorero di Alternativa Democratica Sindical de las Americas (ADS).
Nan lo trece nan punto di bista riba e tema aki y segun Figaroa a menciona, Kalkach Navarro di CROC ta representa den su mayoria e trahadonan di Turismo na Mexico, “nan economia y miembresia ta hopi similar na esun di Aruba y ta interesante tambe pa wak su perspectiva na un nivel mas halto”.
Despues di e presentacion di oradonan, lo tin un discusion y panel riba e tema pa intercambia ideanan y perspectivanan cu lo trece dilanti.
Figaroa a anuncia cu nan delegadonan ta wordo invita, esaki ta un evento dirigi pa nan y nan ta espera di por yega na puntonan di pensamento comun a base di lo cual lo wordo treci dilanti door di oradonan invita.
Manera a wordo menciona caba, e congreso lo tuma luga dia 15 di september for di 7or di anochi te cu 10or di anochi na Hyatt Airport Aruba, delegadonan por cuminsa haci nan registracion for di 5or di atardi.
Dia 16 di september for di 8or di mainta lo cuminsa registracion di delegadonan pa eleccion di mesa di directiva, pa asina scoge un directiva nobo pa periodo 2021-2024 y diabierna 17 di september lo tin postulacion y eleccion di candidatonan pa e directiva, ademas di e clausura di e congreso.
