Presidente di Fedecamaras, Carlos Larrazábal, a sigura diarason pasa cu formalmente ya hiperinflacion a yega na e pais.
“Esey ta dramatico, pasobra e ta descapitalisando nos tur por igual, y gobierno ta inyecta likidez monetario di mas di 900% den e aña aki so caba, cu ta e gasolin principal di e inflacion,” Larrazábal a bisa durante e Encuentro Empresarial 2017 realisa na Valencia. Segun su opinion Venezuela por cera aña cu un inflacion di por lo menos 1500%.
El a declara cu e variable cu mas ta afecta ta e atakenan di gobierno contra sector comercial, debi na e fiscalnan cu ta obliga e comerciantenan pa baha e prijsnan cu 50%, loke segun Larrazábal ta hiba nan na kiebra.
“E trahadornan no lo tin empleo mas na januari pasobra ta descapitalisando e comerciantenan cu pa mayoria ta negoshi familiar cu no tin modo di responde,” presidente di Fedecamaras a bisa.
Fedecamaras a señala cu e crisis cu e pais ta pasando aden lo provoca den prome trimester di otro aña algo mas negativo ainda pa e poblacion. E ta resalta cu loke e poblacion mester bay consumi den inicio di 2018 lo mester ta sembra caba, pa por cosecha. “Lamentablemente a sembra solamente 60% di loke tabata produci antes,” Larrazábal a señala. El a resalta cu produccion di sector primario a cay 60 pa 70% tambe pasobra e productornan no ta ricibi divisa oficial desde luna di augustus, pa cumpra insumo necesario den exterior.
“Nos ta mira preocupa con economia ta dolarisando na un ritmo inedito, pero gobierno no ta tuma medida, y ta inventa criptomoneda cu no ta duna confiansa na inversionista,” el a señala.
Larrazábal a sigura cu su entidad ta calcula pa fin di 2017 Venezuela lo registra un caida den economia di riba 12,5%. E caida aki ta mas halto cu entidadnan internacional ta proyecta. Cepal (Comision Economico pa America Latino y Caribe) ta anticipa un caida di 9,5% di e PIB (GDP). Banco Mundial/IMF recientemente a calcula e caida economico di Venezuela na 10%.
