Mediante un publicacion haci pa Cuerpo Policial di Aruba, nan a informa cu mañan nan ta bay ta na diferente lugar, tanto di San Nicolas como Savaneta y Pos Chiquito, pa mustra esnan cu a haci nan peticion pa permiso e lugarnan unda mag di campa.
Diasabra dia 16 di maart 2024, Polis di districto di San Nicolas ta invita tur persona cu a haci nan peticion pa temporada di campamento pariba di brug, cu lo mustra nan e sitio cu nan lo campa.
Lo cuminsa 9’or di mainta den e area di Santana di Cacho, despues pa Baby Beach, Rodgers Beach y por ultimo pa e area di Zwat Mangel y Grapefield. Pa 1’or di merdia lo sigui na Savaneta y Pos Chiquito.
Pa loke ta trata otro areanan manera Playa, nan tambe ta haci esaki segun vocero di Polis, Liliana Rasmijn a sigura, e campadornan tin bon comunicacion cu otronan y cu polis.
Diadomingo 24 di maart ta e dia oficial cu campamento ta cuminsa e aña aki na Aruba for di 12or di merdia y lo caba 7 di april, segun Cuerpo Polis a informa recientemente.
Relaciona cu temporada di Semana Santa halto comisario di Polis Sr. Ramon Arhem ta haci un yamada fuerte na campadornan pa tene cuenta cu e condicionnan bao di cual e permiso ta ser otorga.
E fecha riba cual e campadornan por cuminsa campa ta diadomingo 24 maart 2024 pa 12or di merdia.
Loke ta nifica cu riba e fecha y ora stipula ta permiti pa pone trailernan y tentnan riba banda di e beachnan. Tur obheto cu ser poni prome cu e fecha y orario stipula lo ser kita pa polis.
E ultimo dia di campamento lo ta dia 7 april 2024.
Despues di campamento tur obheto mester ser kita for di beachnan. Si esaki no sucede, polis lo kita esakinan riba gasto di e campador.
Durante campamento percura pa tin tur informacion necesario:
Seguridad
First aid kit
Control riba mucha menor di edad
Seguridad durante e periodo aki.
Potret ta di KPA.
