Dialuna, 8 di mei tabata un dia cu a haci historia pa idioma Papiamento na Colegio Arubano, pa motibo cu pa prome biaha studiantenan di Havo 5 a traha examen na Papiamento di e materia Papiamento. Tempo cu Papiamento a drenta enseñansa secundario Havo/VWO no tabata existi e oportunidad pa e bira un materia di examen, pa motibo cu e docentenan di Papiamento no tabatin e preparacion di prome grado manera ta e exigencia pa duna les den e klasnan di examen. Pero Papiamento no solamente a demostra di ta un idioma stabiel y cu potencial mescos cu tur otro idioma na Colegio Arubano, sino tambe cu Papiamento tin e cualidadnan pa desaroya docente riba nivel di ‘bachelors’ y ‘masters’.
Dos aña pasa a bin e estudio di ‘Master of Education’ na Universidad di Corsou y asina a crea e oportunidad pa e docentenan di Colegio Arubano sigui e specialisacion di Papiamento y finalisa nan estudio cu exito y di e forma aki crea e oportunidad pa Papiamento bira materia di e klasnan di examen. For di aña escolar 2016-2017 e studiantenan di Havo y VWO4 di Colegio Arubano tabata tin e oportunidad di scoge den nan pakete, pa finalisa Colegio Arubano, e materia Papiamento. Ayera a toca turno na 49 studiante pa traha e examen di Papiamento. Un momento masha emocionante pa tanto e alumnonan y nan docente.
Seccion di Papiamento di Colegio Arubano ta sinti nan contento y orguyoso cu e logro di Papiamento, na scol y kier a desea tur studiante hopi exito cu nan examennan.
