Minister di husticia a palabra hunto cu secretario di estado di Hulanda cu lo extende e fecha final pa trece cambio den ley LTU te cu october.
Ademas e lo bay palabra riba otro temanan cu ta afecta comunidad cu e mesun secretario. Siman pasa minister encarga cu husticia, siguridad y integracion, Andin Bikker (POR) a toca cu Mark Harbers, secretario di estado di husticia y siguridad di Hulanda, e topico di buraconan entre permiso cu ta haci dificil pa personanan naturalisa desde nos pais pa haya nacionalidad Hulandes. Ademas di esaki el a trece dilanti pa mas posibilidad pa yega na mas dispensacion pa loke ta trata e examen di Hulandes pa naturalisacion.
E siman cu a pasa minister encarga cu husticia y integracion lo a sinta hunto cu secretario di estado di Hulanda encarga cu ley di Reino riba nacionalidad Hulandes (RWN) pa haci algun cambio den e ley aki. Un parti di e concepto cu nan a prepara segun director di Dimas, Kathy Paskel-Ruiz ta encera cu lo cambia e ‘modelo Suiso’ cu formalmente ainda ta hinca den e ley.
Extension
Riba esaki sr. Bikker por a confirma durante un conferencia di prensa cu nan a logra haya un extension pa bin cu e cambionan den e ley di admision LTU di Aruba. Esaki mirando cu e mandatarionan di Hulanda a manda, segun sr. Bikker den un carta pa e gabinete anterior indicando cu nan lo tin te mei di 2017, pa cambia esaki. “Pero e mandatario anterior parce tabata mucho ocupa cu campaña pa tuma e conseho di Hulanda.”
Anteriormente e cambio cu lo mester a bin tabata basa riba un maneho cu tabata anticipando e ley aki ‘mirando cu e tabata den parlamento’, pero cu nunca e yega na cambia. Hulanda, anticipando e cambio aki tabata otorgando nacionalidad Hulandes basa riba e permisonan anticipa aki, segun sr. Bikker.
Sr. Bikker den su bishita a logra palabra cu secretario di estado, sr. Harbers, pa nan extende e fecha final pa cambia e ley aki te october. “Esaki ta ainda poco tempo mirando cu nos mester pasa parlamento ainda.”
Riba e dimension di adresa e parti di buraconan den permiso y excepcion pa tuma test di Hulandes pa naturalisa, sr. Bikker no a logra yega na un palabracion concreto. Sinembargo e secretario di estado a pidi su persona pa manda un carta por escrito cu por detaya kico e situacion ta y con lo kier bin na un solucion pa esaki, pues pa traha riba e detayenan.
Impacto riba comunidad
Manera nos a indica anteriormente, e impacto di e cambionan pa loke ta trata buraconan den permiso y tambe e modelo Suiso cu ta hinca den RWN ainda tin impacto riba e posibilidad pa personanan aplica pa nacionalidad Hulandes. Entre otro hobennan manera, Kenna Hernandez a mustra cu aunke nan ta cla pa representa Aruba den exterior, e espacio entre ley di LTU y ley di RWN ta laga e hoben desampara. Di e manera aki ta bira dificil pa e hoben representa Aruba den exterior na un festival di pelicula internacional na Washington DC.
Minister mes a indica anteriormente, cu cierto personanan cu ta aplica pa nacionalidad Hulandes a base di opcion, mester comproba cu nan tin 15 aña legal na Aruba, ora nan haya un espacio chikito di 1 siman of poco mas esaki ta daña henter e termino legal segun RWN. Esaki ta haci cu personanan mester warda pa 6 pa 7 aña mas cu un permiso legal pa aplica atrobe.
E motivacion pa bin cu dispensacion pa test di Hulandes pa haya nacionalidad di e Reino ta pasobra tin casonan unda personanan tin hopi tempo bibando na Aruba, pero ta inhusto cu na un edad avansa nan mester bay pasa un test di Hulandes cu ‘hopi biaha ta dificil pa rekeri di nan na tal edad’.
