Fecha (2).JPG

Directora di departamento di Higiena, Yvette Geerman ta bisa Bon Dia Aruba cu e desafio di mas grandi pa nan en cuanto ta control na supermercadonan, ta e problema cu fecha di vencemento cual ta mas frecuente den supermercadonan chikito cu den esunnan grandi. Anto esaki ainda no ta totalmente reglamenta.

 

Bon Dia Aruba a combersa cu sra. Geerman tocante e dos restaurant cu a wordo cera temporalmente den centro di ciudad pa falta di higiena durante un accion realisa pa varios departamento di gobierno siman pasa. Sra. Geerman a splica tambe cu tin bastante localidad cu no tin nan carchi di salud na ordo y debi na esaki, e accion y control rutinario ta bay sigui pa haci enfasis riba e cumplimento di tene na ordo e carchi berde.

 

Dianan di fiesta ta na caminda y fuera di restaurantnan, tur supermercado chikito y grandi tambe ta ricibi bishita di departamento di Higiena manera semper pa percura cu tur cos ta den ordo. Specialmente cu dianan di fiesta venidero cu lo tin hopi necesidad di fruta, berdura y diferente comestibel y tur hende semper ta spera di cumpra e cosnan di mas fresco y bon den mercado anto no topa cu productonan daña.

 

Fecha di vencemento
Sra. Geerman ta splica cu pa nan e problema mas grandi ta e fecha di vencemento di productonan bendi cu ainda no ta reglamenta manera cu e mester ta. “Locual nos ta haciendo hopi actualmente ta bayendo cerca nan y duna nan informacion y conscientisacion. Nos ta duna nan e importancia pa nan por realisa nan mes pakico cierto cos no ta aceptabel y cu nos ta cera localidadnan pa un motibo.” Manera Bon Dia Aruba a publica anteriormente, departamento di Higiena ta traha cu keho di locual ta hopi importante pa nan. Nan no ta ricibi mucho keho cerca nan mes y esaki ta algo cu Sra. Geerman a menciona algun luna atras na Bon Dia Aruba cu e ta bisa por duna nan mas asistencia pa por resolve un problema. Mayoria biaha e kehonan riba productonan daña ta  riba rednan social of cu hendenan mes ta papia riba caya.

 

Supermercadonan grandi

Pa motibo cu algun, no tur, pero algun di e supermercadonan chikito rond di e isla ta desorganisa, esaki ta causa cu nan ta haya hopi mas problema cu higiena compara cu supermercadonan mas grandi. Desorganisa den e sentido cu nan no tin nan productonan na ordo, tin cos bruha den otro den warehouse y nan mes no por wak si tin algo robes manera un bestia morto of sushi. “Nos ta controla e supermercadonan en general pa locual ta e localidad. E cuminda mes nos ta controla visualmente, pues bo ta wak e calidad di e cuminda, fruta of berdura,” sra. Geerman ta bisa.

 

Tur supermercado, di grandi te cu chikito, ta ricibi un control rutinario anto mesun tipo di medida ta wordo tuma pa tur. “E exigencia ta cu nan mester cumpli cu reglanan di higiena. Unabes cu nos constata algun tipo di ‘ongedierte,’ un raton of cualkier situacion inhigienico, e ora ey nos ta tuma nos pasonan.”

 

‘Diferencia di cultura ta hunga un rol’
Segun store manager na Superfood, Johan Klein, ta asina cu e diferencia di cultura ta hunga un rol pa locual ta mantencion di un supermercado. Un supermercado Chines por ehempel ta traha den un diferente manera. Sr. Klein ta comenta cu tambe como Superfood ta un supermercado relativamente grandi, nan sistema di controla fecha di vencemento mester ta mas frecuente y responsabel. Locual nan ta haci entre otro ta asigna un trahado na cada ‘shelf’ pa asina check e productonan tur dia. Specialmente poniendo atencion riba e productonan di pan, cookies y tur otro producto di hariña cual segun nan, esaki ta e productonan cu mas atencion bo mester pone na dje sin laga afo e berdura y fruta.

 

Na Ling & Sons por ehempel, nan ta cuminsa baha prijs di e productonan cu ta acercando nan fecha di vencemento y asina segun gerencia, nan ta yuda mantene un miho control riba e asunto aki.

 

Bon Dia Aruba a bishita algun supermercado chikito entre otro, Yu Xia Cash & Carry,  Wan Li Supermarket y varios otro rond di e isla pa un reaccion. Algun di e supermercadonan aki a duna nos e impresion cu nan tabata un poco nervioso na inicio mescos ora cu un mayor ta enfrenta un mucha cu a caba di haci algo malo. Locual varios di e supermercadonan aki a comparti cu Bon Dia Aruba ta cu nan ta controla nan productonan tur siman y ta zorg pa entre otro no tin productonan cu nan ta ripara cu no ta bende.

 

Un di e preguntanan cu Bon Dia Aruba a trece pa dilanti ta con frecuente hende ta bin bek cu nan productonan pa motibo di fecha di vencemento, di locual tur ta bisa cu e no sa pasa hopi mirando cu actualmente nan tin mas control riba esaki.