(AP) – Oficialnan di salud federal Mericano riba diahuebs a pospone un decision di gran importancia tocante e permiso pa e marca di sigaria electronico Juul permanece den mercado, mientras tambe poniendo prohibicion riba e benta di miles otro sigaria electronico.

E Food and Drug administration a bisa cu nan a rechasa aplicacion di por lo menos 950,000 sigaria electronico y otro productonan relaciona, pa motibo cu nan ta producto cu por ta atractivo pa menornan di edad. Actualmente ta bende algun di e productonan, mientras cu otronan a keda como proposicion di e productornan. Pero e agencia no a tuma un decision tocante Juul ainda, cual ta e marca mas popular cu usuarionan adulto y hopi hoben.

Mayor-, politico- y gruponan anti-tabaco a pone presion riba Food and Drug administration varios biaha pa prohibi Juul su dispositivonan cu tin concentracion halto di nicotina, cual hopi ta nombra como e causa di e aumento recien den uso di e dispositivonan aki entre hobennan. Pero e agencia a bisa cu nan tin mester di mas tempo pa por tuma un decision tocante e compania su producto.

“Tin mas trabao pa haci pa por completa e resto di nos revisionnan, y asina por sigura cu nos por tuma e decision y accion corecto pa asina proteha nos nacion su hubentud di e peligronan cu productonan di tabaco por causa, incluyendo e sigarianan electronico,” e agencia a bisa den un declaracion. E agencia a nota cu 80% di e hobennan y muchanan ta usa e productonan aki cu diferente sabor aden.

Accion diahuebs ta parti di un revision general haci pa Food and Drug Administration pa trece revision y evaluacion cientifico riba e industria aki di multi-biyon dollar despues di añanan di retraso di parti di e reguladornan. E agencia te ainda tin di autorisa cualkier di e productonan aki, varios biaha usa pa “vaping” como un opcion menos dañino pa hendenan cu ta huma sigaria.

FDA a enfrenta un ultimatum di corte riba diahuebs pa duna nan decision tocante e aplicacion di Juul y cien otro compania pa por drenta mercado. Un hues federal a pone e fecha despues cu gruponan anti-tabaco exitosamente a demanda FDA pa haci mas lihe cu nan revision.

Pa por keda den mercado, companianan mester demostra cu nan sigaria electronico ta beneficia salud publico. Den practica, esaki ta nifica comproba cu adultonan cu ta huma cu usa e producto, ta mas probabel di stop di huma, of por lo menos reduci nan humamento, mientras cu e hobennan ta menos probabel di desaroya adiccion pa cu esaki.

Reguladornan di FDA anteriormente a bisa cu nan lo pone prioridad riba Juul y otro actornan clave, pero ningun di nan a ser inclui den e agencia su anuncio.

E retraso a ser inmediatamente planea pa gruponan anti-vaping.

“Esaki ta un movida increibel di parti di FDA,” segun Meredith Berkman, co-fundador di Parents Against Vaping e-Cigarettes. “Miyones di famia kendenan su bida a ser cambia pa e epidemia di ‘vaping’ entre muchanan hoben, crea pa Juul, tin hopi tempo sin ricibi e accion cu nan merece.”

Sigarianan electronico, conoci como “e-Cigarette” a aparece pa prome biaha na Merca mas di un decada atrasa cu e promesa di provee hendenan cu ta huma un alternativa menos dañino cu e humamento di sigaria di tabaco tradicional. E dispositivonan aki ta kenta un likido di nicotina te ora cu esaki ta bira un vapor, cu e usuario despues por inhala.”

Pero tin tiki estudio detaya unda ta comproba si di berdad dispositivonan aki ta yuda hendenan cu ta huma pa stop esaki. Y e esfuersonan di FDA di cuminsa revisa e productonan aki y nan promesanan cada biaha ta retrasa a causa di e industria y otro interesnan politico cu ta competi.

Awe, e mercado di ‘vaping’ ta inclui mas di cien compania cu ta bende un gran variedad di productonan y likido di nicotina den varios diferente sabor y nivel den concentracion. Pero mayoria di e mercado ta controla pa un seleccion di companianan, entre esakinan Juul Labs Inc. cu ta doño parcial di e gigante den mercado di tabaco Altria, y Vuse, parti di e trahado di sigaria R.J Reynolds.

E problema cu vaping a tuma un urgencia nobo na aña 2018, pa cu Juul su productonan halto den nicotina cu sabornan di fruta a bira popular den henter e nacion cu muchanan di scol, causando cu FDA a declara un epidemia di ‘vaping’ den muchanan menor di edad. Aña pasa, FDA a limita e sabornan di e dispositivonan aki na solamente tabaco y menthol, cual a causa cu ‘vaping’ entre muchanan hoben a baha. Pero e pregunta ta si e dispositivonan aki mester keda den mercado of no.

Mayoria di experto ta di acuerdo cu e kimiconan den e vapor di e sigaria electronico ta menos dañino cu e huma di tabaco, cual ta contene varios kimico cu por causa cancer. Pero tin poco data concreto cu ta comproba cu ora hendenan cu ta huma stop di haci esaki y cambia pa ‘vaping’ ta causa beneficio y ta stop di huma. Encuestanan ta demostra cu mayoria di hende ta caba na haci uso di tur dos.

Reguladornan di FDA tin aña caba ta adverti e companianan cu nan lo mester somete na estudionan extenso, pero tambe data concreto y di termino largo cu ta demostra e beneficio pa hende cu ta huma si nan cambia pa ‘vaping’. Pero casi tur trahado di sigarianan electronico aki a resisti di conduci e estudio caro y extenso aki.