Problema di precision cu un test di coronavirus usa ampliamente por conduci na resultadonan falso pa algun pacient, segun oficialnan di salud Mericano a adverti.
Food and Drug Administration a duna e advertencia e siman aki na dokter y tecnico di laboratorio usando e test genetico TaqPath di Thermo Fisher. Reguladornan a bisa cu problema relaciona cu ekipo di laboratorio y software usa pa haci e test por conduci na falta di exactitud. E agencia a duna conseho na tecniconan pa sigui instruccionnan actualisa y software desaroya pa e compania pa sigura resultadonan exacto.
E advertencia ta yega casi un luna despues cu oficialnan di salubridad publico di Connecticut a reporta cu sikiera 90 persona a ricibi resultado positivo falso pa coronavirus. Mayoria di esunnan cu a haya e resultadonan falso tabata residente di cas di anciano of centronan di asistencia.
Un vocero di Thermo Fisher a bisa cu e compania ta trahando cu FDA ‘pa sigura cu personal di laboratorio ta compronde e necesidad di adheri estrictamente na e instruccionnan di uso’. El a agrega cu data di e compania ta mustra cu mayoria di usuario ta ‘sigui nos fluho di trabou adecuadamente y ta haya resultadonan exacto’.
FDA a bisa cu un posibel problema tabata relaciona na e uso incorecto di ekipo cu rapidamente ta draai muestranan den preparacion pa procesamento. E carta di e agencia ta bisa trahadonan di laboratorio pa sigui instruccionnan nobo desaroya pa e compania pa e stap aki.
Otro problema ta relaciona cu e software usa riba plataforma di test di Thermo Fisher. FDA a bisa cu laboratorionan mester actualisa e software na un version nobo.
Dr. Albert Ko di Scol di Salubridad Publico di Yale a bisa cu e problemanan potencial di exactitud tin ‘implicacion hopi serio’ mirando cu e test di Thermo Fisher ta ser usa ampliamente tanto na Merca como rond mundo pa screen pa coronavirus.
Na Aruba no ta usa e test di Thermo Fisher. Medlab ta usa Biopharm, Laboratorio di Servicio ta usa Cepheid, y laboratorio di hospital ta usa Seegene, kiermen ningun ta usa e test TaqPath di Thermo Fisher.
Declaracion di FDA no a duna ningun detaye di cuanto resultado di test por tabata afecta pa e problema.
Test di laboratorio ta e base di screening di coronavirus na Merca, contando pa mas di mita di e alrededor di 750mil test haci diariamente. E testnan ta busca restonan di material genetico den swab nasal di e pashentnan.
E test di Thermo Fisher a wordo otorga status di uso di emergencia pa FDA na mita di maart. E test ta core riba un mashin grandi automatisa den hospital, gobierno y laboratorionan comercial pa busca malesa manera HIV, hepatitis y grip.
FDA a usa su podernan di emergencia pa aproba mas di 200 test pa coronavirus desde februari. Ningun test ta perfecto y tur ta spera di duna sikiera un porcentahe chikito di resultado falso positivo y negativo.
