Fundacion Contra Violencia Relacional (FCVR) ta un fundacion cu ta existi pa mas di 25 aña. Hopi conoce e fundacion mas bien bao di e nomber di Fundacion pa Hende Muhe den Dificultad, pero alrededor di dos aña pasa e nomber a wordo cambia pa Fundacion Contra Violencia Relacional.

E fundacion ta traha riba diferente pilarnan. E tin e parti ambulatorio caminda cu cliente por acerca nan pa ayudo, pa guia y empoderamento. Tambe nan tin ayudo residencial cu ta e parti na unda ora un hende muhe ta pasando den crisis, e por haya alohamento temporal na e fundacion y durante e alohamento aki e ta haya su guia y empoderamento cu e intencion cu na momento cu e sali di e fundacion e por para fuerte ariba su pia.

Den un conferencia di prensa recientemente, Magaly Maduro, coordinador di e fundacion, hunto cu Yaxzuly Toyo Gonzalez, psicologo di e fundacion, a splica con e casonan di violencia, cu tin un trend di aumenta, ta relacion na entre otro celebracion di carnaval y consumo di alcohol.

Maduro a indica cu berdad ta mustra cu tin un aumento den casonan di violencia den e ultimo temponan. Esaki, segun el a bisa, no ta sigur si tin di haber cu tin dos aña cu no a celebra carnaval y cu hendenan ta hopi entusiasma, pero den nan entusiasmo nan ta actua den e manera negativo, pero mas cu claro e ta algo alarmante.

“E fundacion ta tene cuenta cu esey. Nos ta wak con via e campañanan nos por aborda esaki, pero den tur e añanan nos ta mira cu no tin solucion un, dos tres pa e problema aki di agresion y violencia,” Maduro a remarca.

El a sigui splica cu violencia no tin di haber cu un solo factor, tin mas factor ta hunga un rol, entre otro e periodo di Covid cu a pasa, e cuarentena cu tabatin, falta di oportunidadnan pa sali, e mal uso di alcohol, droga, etc.

Toyo Gonzalez a agrega cu tambe e parti na unda a normalisa e uso di alcohol entre hobennan y cu ta cana den gang. “Esaki ta hunga un rol unda cu violencia ta wordo eherce. Un grupo contra otro y nos ta normalis’e, pasobra si mi ta cana den un gang e ora ami tin un poder mas halto. Esaki ta un di e tanto factornan cu ta sostene e parti di violencia,” el a enfatisa.

Pa loke ta trata violencia entre parehanan hoben, Toyo Gonzalez ta indica cu esaki a aumenta y aunke aworaki e fundacion ta sigui papia, ta sigui conscientisa, ta keda trece e informacion aki dilanti, cada biaha tin mas casonan di violencia entre hobennan, entre pareha cu ta sali pa dilanti y ta keda bin dilanti.

Den e casonan aki, el a splica, tin diferente factor cu ta hunga rol. E parti di con e dinamica na cas ta, ta hunga un rol hopi importante cerca e hobennan, y sobretodo den a parti unda ta bisa cu e mayornan ta e spiel di e mucha- y hobennan. Si tin violencia na cas e porcentahe ta hopi halto cu esaki lo ripiti, Toyo Gonzalez ta subraya.

Pa loke ta e casonan di violencia den e ultimo10 añanan, Maduro a indica cu nan registracion ta hopi bon pa cual motibo por mira un aumento di e casonan, pero den esaki, el a remarca, cultura ta hunga un rol, tradicionnan ta hunga un rol den henter e problematica di violencia y ta algo cu ta dificil pa aborda.

Den temporada di carnaval, FCVR ta haci campaña tambe caminda nan ta purba conscientisa pueblo cu mester disfruta di carnaval di un manera consciente y di un manera saludabel. “Bayendo cu e muchanan carnaval na unda por expone nan na violencia, esey tambe ta algo cu nos ta adresa den nos campaña pa conscientisa mayornan cu esaki no ta bon.” el a agrega.

FCRV ta activo henter aña, pero den e periodo di carnaval nan ta mira cu tin hopi casonan, mescos cu den temporada di Pasco. “Unda cu tin hopi consumo di alcohol y substancia, bo ta mira un aumento,” el a señala.

Esaki tambe ta e caso pa temporada di campamento cu ta bin net despues di carnaval. Den e temporada aki e fundacion ta mira un aumento. Maduro ta indica cu tin cierto patronchinan cu nan ta reconoce y nan ta purba gara na esaki y nan ta purba conscientisa e pueblo cu campañanan, pero e responsabilidad tambe ta na esnan cu ta eyfo.

“Si bo ta mira bo famia, bo ruman, bo mester adres’e y bisa mi ta kere cu esaki no ta caminda cu e mucha mester ta, ban evita problema. Papia cu otro tocante consumo di alcohol, pero e cos ki ta hopi taboo ainda y riba esey tin tereno pa traha,” Maduro ta enfatisa.

Toyo Gonzalez a recorda cu FCVR ta traha di un manera curativo, pero tambe di un manera preventivo pasobra tanten cu e personanan no tin informacion y no sa kico ta violencia, e ora nan t’ey pa informa den e parti aki. “Hopi di nos hoben- y muchanan, hasta di nos adultonan, nan no ta consciente cu nan ta pasando door di un violencia,” el a indica.