Ayera FCCA a firma un contract cu banconan y fundacionnan di fondo di pensioen pa refinancia un fiansa di 2008, y un suma adicional pa proyectonan di vivienda.
Caribbean Mercantile Bank, Aruba Bank, Banco di Caribe, Ennia Caribe Leven , Fatum Life Aruba, Stichting Bedrijfspensioenfonds Aruba, Stichting Pensioenfonds Meta bedrijven, Stichting Pensionfund Tourism Sector Aruba, Stichting Fondo di Pensioen di Trahadonan di Empresanan y Fundacionnan Publico a participa.
E compania financiero QUEST di señor Emiliano de Cuba a trece señor Fitzgerald Croes den su team pa a logra regla e contract aki,cu conseho huridico di Brown Laywers NV.
Vida Nova Bank lo fungi como e agente y a ricibi e documentonan for di man di e consehero huridico.
Durante e periodo aki, e team financiero di FCCA a conta tambe cu conseho financiero di Alwyn Lin di Crystal Finance.
Cu e logro aki FCCA ta reforsa su posicion financiero y ta cla pa sigui brinda e ayudo necesario na nos comunidad den nan necesidad pa vivienda adecuado y pagabel, asina e banco di hipoteca ta bisa.
