Reguladonan Mericano a propone duna boet na companianan telefonico mas di $200 miyon combina pa inapropiadamente revela ubicacion actual di nan cliente na otro compania.
E multa proponi pa Federal Communications Commission (FCC) ta yega na $91 pa T-Mobile, $57 miyon pa AT&T, $48 miyon pa Verizon y $48 miyon pa Sprint. E cantidad ta varia basa riba con largo cada compania a bende e data di usuario y na cuanto compania y organisacion a bende e data. E companianan telefonico por apela, y e suma por cambia.
Criticonan a bisa cu FCC a dura mucho largo y e boetnan proponi ta mucho tiki.
Lisa Hayes, di grupo defensor Center for Democracy & Technology a bisa cu FCC su ‘respuesta debil pa cu cumplimento’ ta demostra pakico Merca tin mester di un ley di privacidad comprensivo.
Data di ubicacion ta posibilita identificacion di casi cualkier celular na Merca den un par di seconde. Segun reportenan publica, companianan telefonico tabata bende acceso na data asina na companianan poco conoci, manera LocationSmart y Zumigo. E brokernan di data aki a bende e informacion na otro servicionan ‘basa riba ubicacion’ manera compania di comunicacion di prizon, Securus. FCC a bisa cu e companianan telefonico a faya di pidi clientenan permiso pa locual companianan manera Securus tabata haci, of sigura cu e companianan aki tabata ricibi permiso di clientenan.
Accion di FCC ta aborda e practica di companianan telefonico di provee data na terceros cu cual e clientenan no tin contacto directo. E data no ta relaciona na usuarionan compartiendo ubicacion directo cu app y otro servicionan. Ley Federal ta rekeri pa companianan di telecomunicacion protege confidencialidad di algun data di usuario, incluyendo informacion di ubicacion. FCC a bisa cu e companianan aki mester purba protege contra intentonan no autorisa pa haya acceso na e data aki, y cu nan of esunnan actuando den nan nomber mester ricibi permiso di clientenan.
FCC a inicia investigacion despues cu un reporte na 2018 a mustra Securus permitiendo abuso manera permiti un comisario track un hues, entre otro, danki na informacion cu a bin di broker di data, LocationSmart.
