Na 2015, $220 miyon a bay perdi na fraude na Merca. Na 2019, e perdida ta surpasa $1.5 biyon, segun WFG National Title Insurance Company.
Den pasado, intento pa gaña hende tabata hopi biaha slordig, segun agentenan di FBI a bisa periodistanan diabierna. Awo nan ta sofistica. Si hende ta ricibi un peticion via email pa transferi placa prome cu un fecha limite, na luga di core hacie, nan lo mester yama un number conoci di e persona cu supuestamente a manda e placa y confirma e peticion, e agentenan a bisa.
“E e-mailnan ta bon traha y hopi detaya. Nan ta altamente specifica na e victima ey en particular”, segun Gabriel Gundersen, agente special di FBI cu Oregon Cyber Task Force. “Ta un pieza di ingenieria social, unda nan ta forsando un victima pa haci algo basa riba un agenda artificial of un fecha artificial.”
Den un di e casonan mas grandi di su indole den historia Mericano, autoridadnan federal na Los Angeles a anuncia un enhuiciamento na augustus contra 80 persona, mayoria di nan di Nigeria, acusa di horta $6 miyon den un red di scam via email y labamento di placa. George Chamberlin, agente special assistent di FBI a cargo di e division di Portland, a bisa cu casonan asina ta dura añanan pa desaroya.
Asociacion entre victimanan, agencianan local di cumplimento di ley, FBI y su oficinanan den exterior, y agencianan di cumplimento di ley den otro paisnan ta critico pa combati e crimen transnacional aki, segun Loren Cannon, e agente special di FBI a cargo di oficina di Portland.
Na Oregon, e perdida a surpasa $24 miyon for di crimennan relaciona cu computer, for di 1 di januari te cu dia 30 di september e aña aki. Pa henter aña pasa, a horta $23.5 miyon, segun FBI.
A perde mayoria di e placa den asina- yama scam di e-mail di negoshi, den cual gruponan di crimen organisa ta gaña victimanan pa haci transferencia di placa na cuentanan di banco controla pa e criminalnan.
