Diahuebs 10 di maart den oranan marduga, a surgi un interupcion den produccion di coriente na WEB. E interupcion a surgi alrededor di 3.25 am y pa mas o menos 5.25 am a logra 100% recuperacion di produccion. Esnan cu tawata lanta na e momento ey por a sigui updates riba WEB su pagina di Facebook y via websitenan y noticieronan local. Un cantidad di bario a keda sin coriente y den e caso aki ta papia di un brownout. Un investigacion preliminar ta mustra cu a surgi un fayo den sistema di operacion di Windpark Vader Piet, durante upgrading di software. E upgrading tawata planoa pa 3 am y no a anticipa cu lo por tawatin un impacto riba suministro di coriente. E fayo a trece un desbalance den sistema di produccion di WEB. Pa mantene e sistema ariba pia y evita un blackout total, operadornan a haya nan forsa pa interumpi coriente den diferente area riba nos isla. Entretanto un investigacion mas profundo lo mester mustra con por preveni un suceso parecido den futuro.
E proceso di generacion y suministro di coriente ta consisti di operacion di entre otro boiler, turbina, molina di biento, panel solar y generadornan RECIP di WEB, hunto cu cabel pisa di coriente, transformadornan y substacionnan. Esakinan ta maneha pa operadornan di forma cutur ekipo ta reacciona segun e demanda di coriente di nos isla ta cambia. Si diripiente e demanda subi of baha, operadornan di WEB mester por reacciona hopi liher pa por mantene e generacion di coriente stabil.
Na momento di un brownout, comunidad ta exigi informacion al instante di kico a pasa y principalmente cuanto ta bay dura pa e situacion normalisa. E lo cual cu ta comunica na un momento asina ta e lo cual ta conoci na e momento ey. Pa WEB e prioridad e momento ey ta pa reestablece e situacion di coriente. Despues, ta haci investigacion mas profundo pa determina kico mester haci pa evita ripiticion.
Aunke cada interupcion di coriente ta uno di mas, WEB ta haci su maximo esfuerso pa cumpli cu su norma di no tin interupcion pa aña. E compania di awa y energia ta ofrece su disculpa pa e inconveniencia cu comunidad a sufri awe den oranan di marduga.
