Ayera den oranan di atardi, WEB Aruba NV a informa cu un fayo su plantanan a causa un interupcion na diferente bario, incluyendo partinan di Playa, area di hotel, Santa Cruz, Savaneta, Pos Chiquito, un parti di Paradera y San Nicolas. Nan a referi na e situacion como un ‘large brown out’.
Inmediatamente team di WEB a cuminsa haci investigacion riba e causa. Alabes, a indica cu e interupcion di coriente a causa presion di awa abao.
WEB a indica cu lo dura mas o menos 2 pa 3 ora pa recupera coriente. Sinembargo, algun minuut despues a informa cu coriente tabata back den area di hotel y na Hospital, sigui pa Palm Beach y Noord.
Igualmente, WEB a pospone e celebracion cu tabatin planea pa ayera pa empleadonan di WEB pa motibo di e brown out, y a pidi comprension di e empleadonan, mientras e compania a pone tur enfoke riba recuperacion di suministro di coriente.
Finalmente, WEB a conclui cu e casa di e brown out tabata cu tiki despues di 5or ayera, a surgi un cortocircuito den un di e transformadornan den planta di WEB, cual a conduci na interupcion di coriente pa diferente area di nos isla. Debi na e fayo aki e sistema cu ta pomp awa pa Aruba a perde coriente tambe y consecuentemente a paga y presion di awa a cay pa varios parti di Aruba. Personal di WEB tabata bezig recuperando e coriente pa e pompnan aki pa por start esakinan atrobe.
Mientrastanto tabata bezig reestableciendo coriente na e partinan afecta hunto cu personal di ELMAR na e Substationnan rond Aruba. WEB a indica cu e proceso mester bay hopi controla pa asina e planta no cay atrobe, ya cu e situacion ta delicado.
