Fayo den formato… Y fayo den contenido…

Despues di e promer debate organiza pa Camara di Comercio, e opinionnan tabata practicamente unanime encuanto e set up y su resultado decepcionante. A bin un avalancha di sugerencia di tur banda y lo ta bon si e organisacion duna oido tambe, pa por mehora pa e siguiente debate. Nos no ta bay cansa hende cu añadi un monton di sugerencia cu probablemente nan a scucha caba. Mester bisa tambe cu ta obvio cu no ta nada facil pa haya un formato cu ta fit un debate di 12 partido, cu consecuencia cu exito no ta garantiza tampoco na e siguiente ocasion.

Sin embargo, mester observa cu tabata haci falta cierto elemento cu den pasado e mesun organisacion aki a tuma hopi na cuenta. Esey ta por ehemplo cu e formato usa siman pasa tabata limita na transmiti pregunta cu no tabata semper bon redacta, mientras cu tabata sinti falta di un introduccion basa riba ‘facts’ loke lo a duna un poco mas cuadro na e preguntanan. Esey lo a yuda pa no solamente guia, sino tambe evita cu e politiconan por a ‘tuma e pregunta y bay dal un buelta cune’. Den e contestanan nos tabata scucha con politiconan ta scoge, deliberadamente of no, pa ignora e hechonan cu actualmente ta rondona e temanan. Ehemplo di esaki tabata cu ora ta papia di kico haci cu gasto di personal di gobierno, y no a menciona cu den e acuerdo cu Hulanda ya a acorda cu ta bay corta 20% di gasto di personal den 5 aña, tumando 2020 como ‘aña base’ pa esaki. Nos a yega di comenta anteriormente caba den e Editorial aki cu esey ta implica, cu un payroll di alrededor di 8.000 persona, sigur 1.500 cupo di trabao, o tuma otro medida pa baha gasto. Manera ta bisa na Hulandes: ‘het moet uit de lengte of uit de breedte komen’. Sabiendo esaki, argumentonan manera ‘no mester di retira ningun hende’ ta zona bon pa esnan cu no tin un idea di con e cosnan aki ta hinca den otro, y nos por constata atrobe cu ta purba gana voto cu mantene e electorado mal informa. Y ta e organisador di e debate mester percura pa informacion y no laga politico bay ‘all over the place’ cu ponencia cu no tin ningun base den realidad. Aki tabata haci falta naturalmente e debate berdadero, unda un politico cu si ta interesa den duna informacion corecto, por a coregi e colega cu ta tuma un rumbo di desinformacion. Lamentablemente no tabatin espacio pa esey.

Pero esakinan no tabata e unico momentonan di iritacion cu tabatin. Ta decepcionante ora ta papia di reforma fiscal y ta tende varios orador comenta cu “awor cu nos ta bay den impuesto indirecto”, bo ta haya e impresion cu nan no ta domina e materia… Nos tin años caba den impuesto indirecto, no ta algo cu ta bay introduci awor… Esaki ta duna nos e impresion cu tin varios lider para e dia nochi eynan cu un conocimento deficiente di e diferente materianan. Asina tambe bo ta haya mas desviacion den direccion cu no ta yuda ningun hende.

Otro decepcion tabata e forma con ta papia di San Nicolas. Henter e ciudad ey ta keda reduci na un lugar unda mester crea empleo, y si por cu proyectonan fantasma cu tin varios decada ta subi escenario cada cuatro aña. Ki dia nos ta bay hiba un debate drechi tocante e berdadero problemanan di e lugar, manera e centenares, si no ta un par di mil vivienda cu ta candidato pa demolicion, pasobra den un distrito asina empobreci tin hopi hende, principalmente esnan di edad cu a mira gran parti di nan famia bay exterior – esun cu no ta kere mester djis tira un vista riba e anuncionan di fayecimento – cu pa hopi aña caba no tin e recursonan pa mantene nan vivienda. Ta realmente un berguenza di mira 12 pretendiente di mehora condicion den nos pais, sin cu ni un momento ta acerca e problematica di e banda ey. Semper e discusion ta keda pega na e nivel patetico di ‘habri refineria, bin cu fast ferry, habri un hotel’… Ki dia ta bin un partido cu ta priminti nos algo realizable, di por lo menos bin cu un equipo profesional di planificacion multifacetico cu ta bay traha un plan realistico pa atende e problemanan berdadero, incluyendo desaroyo economico, cu ta carga un minimo sikiera di credibilidad. Aha, anto esaki tambe: por fabor no inclui solamente esnan cu ta forma parti caba di e entorno politico di esnan cu ta bay goberna. Habri wowo y mente pa e hecho cu nos problemanan ta asina grandi, cu no ta cuestion di forma ‘dream team’ di hende cerca di e politico caba y ya nos lo ta na caminda pa resolve tur e problemanan aki.

Si nos no kier perde speranza completo cu nos por sanea e situacion den e pais aki, ta absolutamente necesario cu no por pasa cada cuatro aña na exclusion di tur hende cu conocimento, cu no ta den e ‘inner circle’ di e gobernantenan. Si nos ta keda ripiti esey, nos ta keda haya e mesun resultado, cu a pone nos unda nos ta awe. Un debate bon organisa o mal organisa, no ta bay cambia esey tampoco.