(AP) – Un residente di Los Angeles County cu un sistema inmunologico comprometi a fayece di Monkeypox, oficialnan local a anuncia dialuna. Aparentemente e ta e prome fatalidad di e malesa.
Los Angeles County Department of Public Health a anuncia e causa di morto, y un vocero a bisa cu esaki a ser confirma pa e autopisa. E pashent tabata severamente comprometi pa causa di su sistema inmunologico y mester a keda hospitalisa. No a duna informacion adicional tocante e persona.
Centers for Disease Control and Prevention ta monitor e casonan y te ainda no a confirma ningun fayecimento di e malesa na Merca. Oficialnan di Los Angeles County a bisa cu nan a traha conhuntamente cu Centers for Disease Control and Prevention riba e caso.
Un vocero di Centers for Disease Control and Prevention a confirma e cooperacion pero no a responde inmediatamente na momento cu a puntra si esaki ta e prome fayecimento na Merca.
Texas su oficialnan di salud publico riba 30 di augustus a reporta tambe e fayecimento di un persona cu a ser diagnostica cu Monkeypox. E persona tambe tabata severamente comprometi inmunogolicamente y nan caso ta bao investigacion pa determina ki rol Monkeypox a hunga den nan fayecimento.
Monkeypox ta ser plama door di contacto cercano di piel y pa medio di exposicion prolonga na druppel respiratorio. E por causa blaar, keintura y dolor di curpa. Relativamente tiki persona ta rekeri hospitalisacion y solamente a reporta un cantidad chikito di fayecimento mundialmente relaciona cu e malesa.
Centers for Disease Control and Prevention ta recomenda e vacuna di Monkeypox na personanan cu ta cercano na un persona cu tin e malesa, personanan cu tin un pareha sexual cu a ser diagnostica durante 2 siman y hombernan gay of bisexual cu tin varios pareha sexual den dos siman, dentro di un area unda cu ta conoce brote. E vacuna tambe ta recomenda pa e empleadonan di cuido di salud cu ta na riesgo halto di exposicion na e virus.
