Siman pasa a bira conoci e noticia cu periodista y maestro di ceremonia, Hubert ‘Juby’ Naar a fayece, causando tristesa entre algun miembro di comunidad. Sinembargo, pa otronan, e suceso a trece recuerdonan di algun decada atras, di e asesinato di escritor y politico Nicolas Piña Lampe.

De Leidse Courant, den su edicion di diasabra 3 di juni 1967, a publica un articulo titula “Asesinato politico (?) na Aruba,” a informa di e asesinato. “Nicolas Piña (46) hefe di departamento di informacion na Aruba, a ser asesina ayera nochi na su cas. Polis a aresta un homber di 24 aña, kende tabata traha p’e. Piña, un Hulandes naturalisa for di Venezuela, tabata candidato pa Conseho di Isla y ta teniendo cuenta cu e posibilidad cu e asesinato tabata na man di rivalnan politico. No ta descarta otro motibonan.”

Segun un articulo den Arubaanse Courant edicion di dialuna 5 di juni 1967, “Centenares a compaña Nicolas Piña na su ultimo lugar di descanso.” Na e acto funerario, minister y lider di Partido Patriotico Arubano, Sr. Jossy Tromp a “observa cu awor cu Nicolas Piña a fayece, hopi hende a reconoce ki figura util e tabata den e comunidad Arubano.”

Den e articulo aki ta destaca cu autoridadnan policial a informa cu e culpable, H.N. di 24 aña di edad “no a duna ningun informacion tocante e motibo pa cual a dicidi di pone un fin asina cruel na bida di Sr. Piña-Lampe.”

“Nos a ser informa cu si e culpable a duna un declaracion, pero cu e declaracion aki no ta completamente aceptable. E pruebanan di sanger y orina na cual e culpable a ser somete, a duna como resultado cu e culpable no tabata bao di influencia di alcohol.”

Ademas, a nota cu “diabierna mainta diesun’or e culpable a ser hiba na e lugar na unda el a comete su acto y e mester a indica na polis exactamente e forma den cual el a comete su delito. Hopi persona a ser y lo sigui ser interoga den e caso aki. Entre nan, e personal completo di e departamento di informacion di gobierno insular na unda tanto e defunto como e culpable tabata traha.”

Piña a bira victima di asesinato dia 1 di juli 1967 den bario di Tarabana na Oranjestad. E fin tragico aki a elev’e como un figura mitico. Sinembargo, lamentablemente su trabao a keda publica solamente den fragmento di corant, y por solamente imagina kico ta su poesianan completo laga atras.

Nicolas Antonio Piña-Lampe a nace dia 6 di december 1921 na Tocopero, Venezuela. El a bin biba na Aruba unda el a identifica cu e poblacion local, y pa e motibo aki a adopta e nomber di su mama Arubano tras di su fam. Piña tabata kier expresa su mes den Papiamento, y asina el a bira un escritor y poeta prominente. E tabata skirbi den Ingles, Hulandes, Papiamento y Spaño.