Na nos mesa di redaccion a yega informacion di dos situacion of incidente cu a tuma luga den temporada di carnaval pa loke ta trata e medida ‘Faya bo haya’, na unda a bin dilanti cu Cuerpo Policial no ta tuma e accionnan necesario cu ta coresponde na e medida aki. Por ehemplo, ken ta haya boet y ken nan ta djis laga bay?

Den un carta cu redaccion a haya di un grupo di ciudadano preocupa, nan kier haci un denuncia publico di loke a sucede dia 18 di februari ultimo den parada grandi di carnaval na San Nicolas den oranan di anochi.

Den e carta nan ta indica cu despues di e parada, na momento cu tur hende tabata dispone pa bay nan cas, un chauffeur di autobus a keda deteni pa un polis, mirando cu e pasaheronan tabata asumi cu e chauffeur di e bus aki tabata ‘basta burachi’ y lo a bisa cu e ta famia di un alto funcionario di polis.

Igualmente, nan a informa cu Cuerpo di Polis a dicidi di no aresta e persona aki, ni kita su bus, ni pon’e supla, ni dun’e un boet, ni kita su rijbewijs, sino cu a dicidi di duna e servicio di hib’e te na su cas cu su mesun autobus.

E grupo ciudadano preocupa ademas a informa cu nan a mira un mucha menor di edad sinta dilanti hunto cu e chauffeur, cu nan ta supone di ta su yiu.

Mirando e peliger cu un situacion asina por causa, nan a dicidi di haci e denuncia publico aki y pone na haltura e instancianan concerni pa haci un investigacion urgente di kico realmente a sucede e dia ey y pakico e persona no a haya su debido proceso si ta berdad cu e tabata bao influencia manera nan ta sigura; y si e no tabata bao influencia, pakico no a lag’e sigui core su bus y hiba e personanan te na nan cas?

Den un otro incidente den trafico, un ciudadano a conta cu dia 5 di februari ultimo el a keda envolvi den un accidente di tres auto dilanti di rotonde di Wayaca na unda e auto cu a causa e accidente no tabatin seguro, ni rijbewijs y su plachi number no tabata na su nomber.

E causante di e accidente a bisa na un di e persona afecta pa no yama polis “pasobra mi number ta horta,” mirando con severo e accidente tabata, e dos auto afecta a opta pa notifica polis toch.

Ora polis a presenta un ora y mey despues aproximadamente, e causante di e accidente a bay papia direct cu polis y a splik’e un version di su historia, despues e polis a cana cu e homber na su auto y el a cuminsa tuma nota, siguientemente e polis a acerca un di e afectadonan pa splica cu e causante di e accidente no tabatin rijbewijs ni seguro, “e afectadonan mester intercambia numbernan di telefon cu e causante di e accidente ken e ora lo para responsabel pa e dañonan na e dos auto,” e polis a bisa.

Den e caso aki tambe a bin dilanti e pregunta, kico pa haci si e homber aki no lo para responsabel pa e dañonan causa? Pa loke e polis a bisa na un di e afectadonan “e ora ey boso tin cu hib’e corte.”

Un otro pregunta tambe ta wordo haci, pakico no a bay cu e auto di e homber cu a causa e accidente si e no tabatin rijbewijs y polis a lag’e bay? Tambe con por sigura cu e afectadonan por hay’e si mester hib’e corte ya cu nan no a haya un identificacion sino un number di telefon, cu por ta un number falso of e por simplemente nenga di contesta e yamada of block e afectadonan?

E casonan aki ta ilustra cu aplicacion di e medida Faya bo Haya ta selectivo y cu agentenan mes ta dicidi na ken nan ta aplik’e, algo cu ta habri porta pa corupcion y abuso di poder, tambe e ciudadanonan preocupa a señala cu ta algo cu hendenan inocente por te hasta perde nan bida of keda mal lesiona den e situacionnan aki.

Bon Dia Aruba a tuma contacto cu Cuerpo Policial pa pidi un aclaracion di actuacion di polis di incidentenan aki, sinembargo, te ciere di redaccion no a haya un contesta.

Pa e motibo aki, nan ta solicita na cuerpo di polis pa actua di manera mas responsabel y transparente ora casonan asina ta bin dilanti.

Potretnan ta ilustrativo.