Meta pa integracion di mucha visualmente incapacita den enseñansa regular, special y den comunidad

FAVI ta yuda y guia e personanan cu ta ciego y cu limitacion di bista, cu e meta pa contribui na nan alegria di bida. Alegria di bida ta nifica, saca e persona for di su isolacion pa e por biba un bida mas alegre, pa nan tin contacto social y pa bida por tin sentido.

Pa por logra esaki, FAVI ta conta cu un team hopi dinamico, creativo, innovativo y educativo. Den nan plataforma cu nan a presenta nan ta enfoca riba nan “Guia educacional” cu ta bou mando di Meredith Faarup – Laclé y Annemarie Navas.

Dianan pasa FAVI a informa comunidad cu nan a tene un encuentro informativo cu diferente directiva di scol y Minister di Educacion Señor Endy Croes den conexion cu lansamento di nan video di conscientisacion pa detecta trempan limitacion di bista y nan website educacional pa sostene tur docente cu tin un alumno cu limitacion di bista den nan klas.

Nan a sigura cu e dos proyecto aki a bira un realidad danki na CEDE Aruba, Pitch Time y gerencia AAA cu a aporta financieramente pa medio di un Proyecto cu FAVI a inicia ya desde aña 2019, nan ta gradici studiante di IPA di Bachelor Papiamento; Michel Montoya cu a sostene FAVI den e proceso di desaroyo di nan website educacional y tambe pa revisa y coregi idioma Papiamento. Por ultimo FAVI ta gradici tur docente y clientenan cu a forma parti di proyecto aki.

Den e website por haya tip practico pa docentenan y esunnan cu tin alumno entre 0 pa 18 aña di edad cu tin limitacion di bista cu ta forma parti di nan enseñansa.

Ora ta papia di un alumno cu limitacion di bista nan ta referi na un mucha cu tin menos di 30% di bista of un mucha cu ta ciego, cu tin 0% di bista.

Pa yuda y guia un docente, nan ta ofrece algun tip cu por ehecuta cu e alumno cu ta visualmente incapacita, e tipnan aki nan ta categorisa bou 4 categoria:

1. Guia trempan di 0 pa 4 aña.

2. Guia pa mucha ciego.

3. Guia pa mucha cu bista limita.

4. Derecho.

Pa loke ta trata derecho, nan ta indica cu un alumno visualmente incapacita por lo general su tempo di traha, lesa y skirbi ta mas poco poco; ta costa e alumno aki mas tempo y concentracion pa busca informacion, por ehemplo, di un alinea pa otro, pa mira e detayenan di un grafiek etc.

Pa e motibo aki, e alumno tin necesidad di algun facilidad adicional pa e por funciona optimal, por ehempel: extra espacio, extra tempo, prueba oral, pauze, lokaal pa e traha su so, etc.

Esaki ta e inicio na unda cu FAVI a sigura cu nan lo keda amplia nan website cu diferente topico di interes, nan  ta invita tur docente pa bishita nan website educacional y pa mas informacion of pregunta por tuma contacto cu FAVI.

FAVI su funcion ta pa brinda guia na mucha entre 0 te cu 18 aña cu tin problema cu bista, tambe nan ta guia e docentenan, e mayornan y otro educadornan na scol, pues den ramo di educacion nan ta percura pa ofrece informacion tocante problema di bista. Ademas, nan ta guia e mucha den cualkier scol cu e mucha aplica p’e.

Ademas, di guia e mucha y e docente den enseñansa regular y special, nan ta ofrece otro tipo di servicio manera:

Duna informacion tocante e problema di bista y e consecuencianan den bida diario.

Observa e funcionamento visual cu su puntonan di atencion.

Traha un plan individual pa e mucha, tene un combersacion di esaki cu mayornan y scol. Evalua y ahusta esaki caminda ta necesario.

Duna conseho pa uzo di medio auxiliar por ehempel: loep ,krijt diki, schrift adapta etc.

Brinda informacion na e scolnan/ instancianan pa medio di diferente curso.

Ayudo cu adaptacion y aumento di material.

Ayudo pa adkiri buki auditivo y den metodo”braille”.

Nan meta segun nan a sigura, ta pa traha hunto cu e mucha, mayor y docente pa por yega na un desaroyo optimal di e mucha cu problema visual, nan ta percura pa e integracion di e mucha visualmente incapacita den enseñansa regular, special y den comunidad, e mucha cu problema di bista lo por desaroya su mes cu otro mucha di su mesun edad cu no tin problema di bista, di e manera aki e mucha lo siña anda cu su limitacion y posibilidad.

“Tur mucha ta unico, cada problema ta diferente, pero, FAVI t’ey pa guia boso” nan a finalisa.