FAVI ta continua cu nan periodo di conscientisacion na caminda pa nan evento Dare The Darkness cual ta un evento culinario organisa totalmente den scuridad, algo diferente y apart pa conscientisa nos comunidad riba limitacion di bista.
E lunanan di Augustus te cu December ta e periodo di mas druk pa FAVI pa motibo cu nan ta organisa varios actividad social. Na Augustus ta cuminsa cu e accion di donacion y continuando cu periodo di conscientisacion di dia di garoti, 15 di October. Manera conoci, semper den luna di September ta bin cu un plan cu diferente actividad manera exposicion di medionan auxiliar pa e grupo di cliente. Siman pasa a haci training cu garoti, cu e enfoke pa train e persona cu ta uza e garoti riba con pa uza esaki den trafico, y alabes conscientisa e trafico un poco di su uzo.
“Nos sa cu no ta hopi cliente ta haci uzo di trafico pero esey no ta kita afo cu mester sigui cu e parti di conscientisacion den trafico,” Sary Wernet-Kelly, Terapista di FAVI ta splica. Den September lo tin cuater anochi di Dare The Darkness cu ta e comemento den scuridad y esey ta bay ta fin di e luna aki, pues un luna yen di actividad sigur. Sin papia ainda riba October-November-December unda comunidad di Aruba lo por cuminsa mira FAVI hopi activo riba caya of por medio di diferente evento.
Desde 2016, bao iniciativa di Pitch Time y CEDE Aruba, e proyecto Darke The Darkness a bira realidad cual ta un cena culinario den scuridad absoluto. Den comparacion cu esnan cu a yega di bay den e Giannis Dinner in Dark unda bo ta haya un paña pa tapa bo wowonan, den e caso di FAVO esaki no ta asina pero bo ta drenta un restaurant totalmente scur. FAVI tin un seis aña mas o menos di experiencia den esaki cual ta un actividad riba su mes, un evento apart cu den futuro lo kier haci esaki realidad cu parti mercadeo, pa atrae localnan y turismo tambe. “Nos soño ta kisas pa un dia den futuro cu e por continua den un otro forma y sigui cu e conscientisacion y experiencia.”
FAVI su mensahe ta pa e persona por realmente experiencia kico kiermen tin un limitacion, pa biba esaki den un momento di realidad di un pa dos ora, conoce nan mes y mira esaki como un manera nobo pa nan mes. FAVI ta enfatisa cu hopi problema di bista por wordo preveni si esakinan wordo detecta na tempo. FAVI no ta haci prevencion completamente nan trabao pero nan ta hinca esaki den nan guia di dia pa dia. Algo interesante pa remarca tambe ta cu durante e eventonan aki ta e mesun clientenan di FAVI mes ta traha. “E aspecto laboral ta importante pasobra ta mustra nan capacidad, dunando nan e abilidad pa asina un dia nan tin durf y aplica pa un trabao den comunidad.”
