Fundacion Arubano di esnan visualmente Incapacita (FAVI) ayera mainta a ofrece un conferencia di prensa pa duna di conoce cu nan accion di donacion di aña 2021 a cuminsa.

Esaki ta un accion manera cu FAVI ta bay cerca comunidad henter pa recauda fondonan, na unda Cetty Baarh, director di e fundacion, a indica cu ta e actividad mas grandi pa asina nan por haya mas fondo.

El a splica cu accion aki di donacion ta encera cu nan ta conta cu personanan boluntario cu ta colecta y cu nan ta bay eherce un trabao pa FAVI, na unda cu nan hunto cu un lista cu nan a ricibi ayera mes, nan lo bay recauda fondo. Riba e lista aki nan tin donante cu ta personanan cu durante hopi aña a bin haciendo un donacion na FAVI.

“E colectador su tarea ta pa bay cas pa cas di cada donante pa haci e trabao cu FAVI su trahadonan no por haci. E ta e brug entre FAVI y e persona cu ta haci e donacion”, Baarh a señala.

E donacion aki ta pa e fundacion por sigui yuda y brinda e servicio na cada un di su clientenan.

Di mesun manera el a comenta cu tin diferente forma pa personanan por bira un donante, cual ta cu mester acerca na FAVI pa haci e donacion; pero tambe por yama y e persona lo haya un splicacion di con por haci esey pa asina por concretisa un cita pa busca e donacion.

Charlene Marchena, guia di actividad, a expresa e diferente servicio cu e fundacion aki ta duna y cu na momento cu un cliente ta yega FAVI ta haya un servicio di e trahado social, ta bay haci un chekeo di bista, despues di esaki e por wordo incorpora den diferente actividadnan cu ta na su interes y tambe na su necesidad.

El a menciona cu e parti importante di nan servicionan ta cu nan clientenan ta wordo desaroya cognitivamente pero tambe social y emocionalmente, un cliente cu ta perde su bista pa hopi biaha ta su so na cas y no ta sali ni un caminda, kisas FAVI ta e caminda na unda cu tur siman por acerca na e fundacion pa pasa un rato divertido y asina mes siña algo nobo hunto cu otro clientenan.

Banda di esey, Marchena tambe a trece dilanti cu nan ta duna servicio na muchanan na unda cu nan ta ofrece guia trempan pa muchanan di cero pa cuatro aña, nan ta duna guia educacional na scolnan, el a indica cu nan tin clientenan cu ta bay pa scolnan special pero tambe nan tin hopi cliente cu ta bay na scolnan regular. Ta p’esey cu nan ta solicita e donacion pa nan sigui yuda e muchanan aki.

“Nan ta personanan cu un disabilidad pero esey no ta stroba nan pa crusa e bareranan y esey nan ta hay’e hunto cu e yudansa di FAVI”, Marchena a sigura.

Asina mes, FAVI tin un grupo grandi personanan adulto caminda cu e fundacion ta duna servicio na nan, ta existi personanan cu semper a gusta cushina, por ehemplo, pero ora nan a perde e bista nan no por haci esaki mas y FAVI ta duna nan guia pa cu esaki tambe, incluso nan tin trahadonan social cu ta ofrece ayudo social na e clientenan y ta haci esey por medio di otro actividadnan tambe manera grupo di combersacionnan cu ta mas terapeutico, segun Marchena a declara caminda tambe nan ta haya solucionnan of kisas ideanan pa nan soluciona nan problemanan.

Naftaly Koolman cu ta cliente di e fundacion a conta cu e tin 34 aña di edad y cu ta sufri di glaucoma na unda cu esaki a causa cu e tin aproximadamente dos aña completamente ciego, el a sigura cu e fundacion ta hopi importante pa su persona pa motibo cu nan ta yudele cu loke e tin mester, “nos bida ta normal, nos ta haci nos cos normal, pero ta yega un momento cu nos tin mester di dos wowo”, el a expresa.

Asina mes, nan a indica cu nan tabatin cierto donante cu na e momentonan aki no por yuda e fundacion mas, e mayoria di e personanan aki ta zeg op y esey ta pa motibo cu nan edad a bira mas halto of ta pa motibonan di salud, te ainda nan tin un donante cu ta un señora di mas di 90 aña manera Baarh a splica, cu a pesar di e situacion cu Aruba ta pasando na e momentonan aki di Covid-19, ainda e ta haci su donacion na unda cu e colectador mes ta bay cerca dje y e ta entrega e donacion.

El a sigura cu e situacion aki di pandemia no tabata mucho bon pa nan pa motibo cu nan no por yega cas pa cas y e parti social ey ta cay afo pero, e contacto telefonico e aña aki pa recaudamento di fondo tabata hopi importante manera nan a ripara.

Pa via di e pandemia nan tambe a mira cu e fondonan a baha un tiki pero nan no kier enfoca riba lo cual nan no a haya, nan kier sigui enfoca riba lo cual nan lo por bay haya, pero si a afirma cu e fondonan a baha.

Nan meta ta pa nan yega na e cifra di 80.000 florin pa asina nan por draai confortabel y nan por haci tur e servicio cu nan ta desea pa haci den un aña.

Pa finalisa, Baarh a recorda cu tambe por haci donacion pa FAVI cu e plataformanan online na unda el a afirma cu por haci un transferencia na e siguiente cuentanan di e banconan:
RBC: 31366122 y Aruba Bank: 702438290 na nomber di FAVI.