Mirando cu recientemente Aruba a ricibi e grato noticia di tin cero caso activo di coronavirus, gobierno a inicia actividad economico den varios fase. Sinembargo, cu cada fase ta bin reglanan nobo cu control mas severo, y tur esaki tin efectonan negativo riba trahadonan indocumenta.

Segun un relato di reportero Sharina Henriquez pa e portal retkaribense, den cual el a papia cu varios persona indocumenta, na momento cu gobierno ta control por ehempel pa cumplimento di medidanan di higiena, alabes ta controla trabou ilegal.

Por ehempel, den sector construccion tin hopi trahado Venezolano, mirando e situacion di pobresa cu pa hopi tempo e pais ta enfrenta. Hopi di nan ta traha di forma ilegal pa varios motibo, por ehempel, tin casonan di fraude cu tramitador di permiso. Y mientras tanto, e trahadonan aki mester sigui busca nan entrada pa sostene nan mes, y tambe nan famia na Venezuela.

Segun retkaribense, trahadonan Latino ta popular den sector construccion, pa motibo cu tin e percepcion cu nan ta traha mas duro cu Arubiano y ademas ta enfermo menos dia, segun doño di un compania di construccion kende a prefera di keda anonimo pa evita represalia.

Segun e persona, e permiso nobo pa construccion ta afecta no solamente e trahado ilegal, sino companianan chikito di construccion, di un forma, kibrando economia.

Ademas, un di e companianan grandi di construccion na Aruba a keha di e proceso mes, ya cu e ta bay demasiado slow. Mientras cu companianan a gasta nan reserva monetario pa sigui paga salario durante lockdown, permisonan ta tarda y e compania ta keda sin placa pa sigui draai. “Kiermen, mi mester gana algo awo y duna mi un boet numa”, otro doño di compania di construccion, kende tambe a keda anonimo, a expresa.

Sin ayudo.
Maske e companianan ta pasando malo, gobierno mes a laga persona indocumenta desampara, bisando cu persona indocumenta no ta cay na remarca pa ricibi ayudo pa crisis di coronavirus. Subsidio di salario y pago di desempleo FASE ta imposibel pa persona ilegal. Segun prome minister Evelyn Wever-Croes, personanan indocumenta mester acudi na fundacionnan y organisacionnan internacional pa ayudo, manera Cruz Cora.

Asina ta sigui haya mas persona indocumenta kende ta keda cera of sin traha pa motibo di control mas estricto. Dianan 8 y 11 di mei ultimo, dies avion mester a transporta hopi Venezolano – algun ken a registra boluntariamente – bek na nan pais. Pero segun minister di Husticia, Andin Bikker, esaki no a bay door pasobra autoridadnan Venezolano a nenga di ricibi e vuelonan. Asina ta cu celnan di stranhero ta yen, y a cuminsa cu welga di hamber, segun Bikker.