Ayera nochi durante conferencia di prensa di gobierno, Prome Minister, Evelyn Wever-Croes a informa tocante eliminacion di toque de queda den efecto actualmente, como tambe inicio di tercer fase di restart nos economia.
Wever-Croes a bisa cu nan ta pone e responsabilidad bek den man di cada ciudadano. Awor cu nan ta kita toque de queda(TDQ) entrante diahuebs madruga awor. El a bisa cu no ta por nada nan a bin cu TDQ pa salvaguardia bida y salud di cada ciudadano di e pais aki. Varios pais cu no a hacie nan a experiencia cu cantidad di hende a muri victima di e virus. No tur a entede e embergadura di e situacion aki, pero un mayoria si. P’esey el a felicita henter comunidad pa nan comportacion pa nan disciplina y compromiso pa saca nos pais dilanti. “Un danki di curason na tur cu a haci’e,” el a bisa. Actualmente tin 1 caso activo di Covid-19. El a bisa cu esaki ta refleha e decision duro cu a duna su resultado pa salba bida di hende. Y si mester bin cu e medidanan aki, nan ta haci’e bek. Pero e ta spera cu tur hende sea consciente, ya cu no ta asina cu nos ta bay na e normalidad di antes. Sino cu mester tene cuenta cu e normanan nobo .
Wever-Croes a informa cu tin tres sector cu por cuminsa brinda servicio entrante dialuna, cu cuminsamento di fase tres. Ta trata di benta di Lotto y Catochi, cu lo tin orario di ceramento pa 6.30pm. E segundo sector ta restaurant (paden), coffee house y panaderia unda por sinta bebe koffie. Pa esaki e orario di ceramento ta 10pm pa duracion di tercer fase. E tercer sector ta spa, masashi y sauna, cu tambe lo tin orario di ceramento pa 10pm. E orario aki ta conta pa cliente, pues personal por keda un tiki mas laat. Pa tur tres sector ta conta protocol di higiena (laba man, usa hand sanitizer, haci superficienan limpi) y tambe distanciamento social. Tur esakinan ta keda vigente durante henter e tercer fase.
Cuminsando awe, no tin toque de queda. Tampoco tin restriccion riba cuanto hende por ta na un luga. Kiermen hende tin libertad pa ta na cualkier caminda publico y na cualkier ora. Tocante esaki, Wever-Croes a comenta cu el a ricibi varios comentario, igual na otro mandatarionan, di hende cu ta keha cu negoshinan ta hopi yen di hende, y no ta tene cuenta cu distanciamento social. El a critica cu hende ta mira cu e luga ta yen, y toch ta drenta. “Si bo yega caminda cu ta yen, no drenta” of informa e doño cu no ta cumpliendo cu reglanan. “Carga e responsabilidad di nos bienestar y nos famia pa nos mes”, pues no pone e doño di establecimento pa para responsabel pa bo bienestar.
Wever-Croes a recorda cu na momento cu nos detecta mas caso di COVID-19 lo por bolbe na e medidanan di contencion.
Di su banda, fiscal Pronk a duna comentario tocante e 158 persona cu ainda ta den cuarentena. El a bisa cu e personanan aki a yega di exterior y mester a bay den cuarentena obligatorio pa 14 dia. Tin un ‘task force cuarentena’ – consistiendo di personal di DVG y Svb – cu ta controla cu e personanan aki ta cumpliendo cu nan condicion di cuarentena, y si no ta asina, por duna un boet cuminsando na mil florin.
Alto comisario interino di KPA, Tjon-Kock a aclarea tocante eliminacion di Toque de Q ueda, un medida cu no ta vigente mas. Sinembargo, ta keda vigente e orario di ceramento pa cliente, pa 10pm. Pa polis, eliminacion di toque de queda, ta nifica cu ta sigui visibel cu control y riba caya pa garantisa siguridad. Mirando cu a elimina toque de queda durante un weekend, Tjon-Kock a suplica pa evita uso di alcohol riba caminda. Finalmente, el a recorda cu, cu eliminacion di toque de queda ta elimina e sistema di tin un boet mara na un infraccion. Kiermen e persona por haya su mes den un situacion unda e ta cay cera, dependiendo di su delito.
